Basqarma tóraǵasy Rýslan Óskenáli jumys saparymen Qaraǵandy óndiristik alańyna baryp, «Nurqazǵan» kenishin jáne Nurqazǵan baıytý fabrıkasyn aralady, dep habarlaıdy Dalanews.kz.
Óndiristik úderisterdiń qazirgi jaǵdaıy týraly keshendi túsinik qalyptastyrýdy maqsat tutqan jumys saparynda jumysshylardyń eńbek jaǵdaıynan bastap, ken óndirý men baıytýda qoldanylatyn tehnologıalyq sheshimderge deıingi máseleler nazarǵa alyndy. Sondaı-aq ónerkásiptik qaýipsizdik deńgeıi jáne jabdyqtardyń turaqty jumys isteýi baǵalandy.
Basqarma tóraǵasy kenishtiń personalǵa arnalǵan ınfraqurylymymen, eńbek jaǵdaıymen tanysty jáne jerasty jumystaryna kýá boldy.
Kompanıa basshysy jerasty jumystarynyń qaýipsizdigi men tıimdiligine tikeleı áser etetin jóndeý ýchaskesine, taý-ken tehnıkasynyń jumysyna, sondaı-aq burǵylaý jáne qazý tehnologıalaryna erekshe nazar aýdardy.
Baıytý fabrıkasynda ken óńdeýdiń tolyq tehnologıalyq tizbegi qarastyrylyp, jumys barysyndaǵy aýytqýlardy jedel anyqtaýǵa jáne tehnologıalyq táýekelderdi tómendetýge múmkindik beretin óndiristik úderisti basqarý men monıtorıńteý júıesine kóńil bólindi. Mundaı tásil óndiristiń turaqtylyǵyn qamtamasyz etip, adamı faktordyń yqpalyn azaıtady.
Jumyskerlermen áńgimelesý barysynda eńbekti qorǵaý jáne ónerkásiptik qaýipsizdik talaptaryn qatań saqtaý, sondaı-aq kenish pen fabrıka jabdyqtarynyń tehnıkalyq, fızıkalyq jáne moraldyq jaı-kúıin saqtaý máselesi talqylandy.
