باسقارما ءتوراعاسى رۋسلان وسكەنالى جۇمىس ساپارىمەن قاراعاندى وندىرىستىك الاڭىنا بارىپ، «نۇرقازعان» كەنىشىن جانە نۇرقازعان بايىتۋ فابريكاسىن ارالادى، دەپ حابارلايدى Dalanews.kz.
وندىرىستىك ۇدەرىستەردىڭ قازىرگى جاعدايى تۋرالى كەشەندى تۇسىنىك قالىپتاستىرۋدى ماقسات تۇتقان جۇمىس ساپارىندا جۇمىسشىلاردىڭ ەڭبەك جاعدايىنان باستاپ، كەن ءوندىرۋ مەن بايىتۋدا قولدانىلاتىن تەحنولوگيالىق شەشىمدەرگە دەيىنگى ماسەلەلەر نازارعا الىندى. سونداي-اق ونەركاسىپتىك قاۋىپسىزدىك دەڭگەيى جانە جابدىقتاردىڭ تۇراقتى جۇمىس ىستەۋى باعالاندى.
باسقارما ءتوراعاسى كەنىشتىڭ پەرسونالعا ارنالعان ينفراقۇرىلىمىمەن، ەڭبەك جاعدايىمەن تانىستى جانە جەراستى جۇمىستارىنا كۋا بولدى.
كومپانيا باسشىسى جەراستى جۇمىستارىنىڭ قاۋىپسىزدىگى مەن تيىمدىلىگىنە تىكەلەي اسەر ەتەتىن جوندەۋ ۋچاسكەسىنە، تاۋ-كەن تەحنيكاسىنىڭ جۇمىسىنا، سونداي-اق بۇرعىلاۋ جانە قازۋ تەحنولوگيالارىنا ەرەكشە نازار اۋداردى.
بايىتۋ فابريكاسىندا كەن وڭدەۋدىڭ تولىق تەحنولوگيالىق تىزبەگى قاراستىرىلىپ، جۇمىس بارىسىنداعى اۋىتقۋلاردى جەدەل انىقتاۋعا جانە تەحنولوگيالىق تاۋەكەلدەردى تومەندەتۋگە مۇمكىندىك بەرەتىن وندىرىستىك ۇدەرىستى باسقارۋ مەن مونيتورينگتەۋ جۇيەسىنە كوڭىل ءبولىندى. مۇنداي ءتاسىل ءوندىرىستىڭ تۇراقتىلىعىن قامتاماسىز ەتىپ، ادامي فاكتوردىڭ ىقپالىن ازايتادى.
جۇمىسكەرلەرمەن اڭگىمەلەسۋ بارىسىندا ەڭبەكتى قورعاۋ جانە ونەركاسىپتىك قاۋىپسىزدىك تالاپتارىن قاتاڭ ساقتاۋ، سونداي-اق كەنىش پەن فابريكا جابدىقتارىنىڭ تەحنيكالىق، فيزيكالىق جانە مورالدىق جاي-كۇيىن ساقتاۋ ماسەلەسى تالقىلاندى.
