WTA (Áielder tennis qaýymdastyǵy) álemniń úzdik tennisshileriniń reitingin jańartty. Qazaqstannyń birinshi raketkasy Elena Rybakina bir saty tómendep, alǵashqy bestikti túiindedi, dep habarlaidy Dalanews.kz.
Al tizimdegi alǵashqy úshtik ózgerissiz qaldy. Atap aitatyn bolsaq, polshalyq Iga Shventek kósh bastap, belorýs tennisshisi Arina Sobolenko ekinshi, al amerikalyq Djessika Pigýla úshinshi orynda tur.
Reitingtegi ózgerister
Rybakinanyń tórtinshi satydaǵy ornyn amerikalyq tennisshi Kori Gaýff basty. Qazaqstannyń taǵy bir tennisshisi Iýliia Pýtintseva da óz pozitsiiasynan aiyrylyp, 35-orynǵa tómendedi. Alaida Anna Danilina juptyq synda jaqsy nátije kórsetip, úsh saty kóterilip, 31-orynǵa turaqtady.
Aita keteiik, Rybakina men Pýtintseva - Qazaqstannyń halyqaralyq tennis arenasyndaǵy mańyzdy tulǵalar. Rybakina 2022 jyly Ýimbldon týrnirinde jeńiske jetkennen keiin álem nazaryn aýdarǵan, al Pýtintseva turaqty túrde halyqaralyq jarystarda jaqsy nátijeler kórsetip keledi. Qazaqstan tennisi úshin atalmysh reiting ózgeristeri jańa maqsattar men bolashaqta jetistikterge umtylý qajet ekenin kórsetedi.
Eske salaiyq, eki sportshy da buǵan deiin Parij Olimpiadasyna densaýlyq jaǵdailaryna bailanysty qatyspaǵan edi.
"Qurmetti qazaqstandyqtar! Maǵan bul týraly aitý ońaiǵa soqpady. Ókinishke qarai, Parij Olimpiadasyna qatysa almaimyn. Ýimbldon týrnirinen keiin men jedel bronhitpen aýyryp qaldym, jattyǵýǵa qaita oralýǵa tyrysqanymmen, denem áli qalpyna kelgen joq. Dárigerler kortqa shyǵýyma úzildi-kesildi tyiym saldy", - dedi Rybakina.
Artynsha Iýliia Pýtintsevanyń da Parij Olimpiadasyna qatyspaityny belgili boldy.
Qazaqstan tennis federatsiianyń málimetinshe, Pýtintseva Parijge ushyp kelip, belsendi túrde jattyǵa bastaǵan. Alaida ýkrainalyq Marta Kostiýkpen bolatyn match aldyndaǵy daiyndyqta qazaqstandyq sportshy tizesin aýyrtyp alǵan. Meditsinalyq tekserýden ótken soń týrnirden bas tartý týraly sheshim qabyldandy.
