WTA (ايەلدەر تەننيس قاۋىمداستىعى) الەمنىڭ ۇزدىك تەننيسشىلەرىنىڭ رەيتينگىن جاڭارتتى. قازاقستاننىڭ ءبىرىنشى راكەتكاسى ەلەنا رىباكينا ءبىر ساتى تومەندەپ، العاشقى بەستىكتى تۇيىندەدى، دەپ حابارلايدى Dalanews.kz.
ال تىزىمدەگى العاشقى ۇشتىك وزگەرىسسىز قالدى. اتاپ ايتاتىن بولساق، پولشالىق يگا شۆەنتەك كوش باستاپ، بەلورۋس تەننيسشىسى ارينا سوبولەنكو ەكىنشى، ال امەريكالىق دجەسسيكا پيگۋلا ءۇشىنشى ورىندا تۇر.
رەيتينگتەگى وزگەرىستەر
رىباكينانىڭ ءتورتىنشى ساتىداعى ورنىن امەريكالىق تەننيسشى كوري گاۋفف باستى. قازاقستاننىڭ تاعى ءبىر تەننيسشىسى يۋليا پۋتينسيەۆا دا ءوز پوزيسياسىنان ايىرىلىپ، 35-ورىنعا تومەندەدى. الايدا اننا دانيلينا جۇپتىق سىندا جاقسى ناتيجە كورسەتىپ، ءۇش ساتى كوتەرىلىپ، 31-ورىنعا تۇراقتادى.
ايتا كەتەيىك، رىباكينا مەن پۋتينسيەۆا - قازاقستاننىڭ حالىقارالىق تەننيس ارەناسىنداعى ماڭىزدى تۇلعالار. رىباكينا 2022 جىلى ۋيمبلدون تۋرنيرىندە جەڭىسكە جەتكەننەن كەيىن الەم نازارىن اۋدارعان، ال پۋتينسيەۆا تۇراقتى تۇردە حالىقارالىق جارىستاردا جاقسى ناتيجەلەر كورسەتىپ كەلەدى. قازاقستان تەننيسى ءۇشىن اتالمىش رەيتينگ وزگەرىستەرى جاڭا ماقساتتار مەن بولاشاقتا جەتىستىكتەرگە ۇمتىلۋ قاجەت ەكەنىن كورسەتەدى.
ەسكە سالايىق، ەكى سپورتشى دا بۇعان دەيىن پاريج وليمپياداسىنا دەنساۋلىق جاعدايلارىنا بايلانىستى قاتىسپاعان ەدى.
"قۇرمەتتى قازاقستاندىقتار! ماعان بۇل تۋرالى ايتۋ وڭايعا سوقپادى. وكىنىشكە قاراي، پاريج وليمپياداسىنا قاتىسا المايمىن. ۋيمبلدون تۋرنيرىنەن كەيىن مەن جەدەل برونحيتپەن اۋىرىپ قالدىم، جاتتىعۋعا قايتا ورالۋعا تىرىسقانىممەن، دەنەم ءالى قالپىنا كەلگەن جوق. دارىگەرلەر كورتقا شىعۋىما ۇزىلدى-كەسىلدى تىيىم سالدى"، - دەدى رىباكينا.
ارتىنشا يۋليا پۋتينسيەۆانىڭ دا پاريج وليمپياداسىنا قاتىسپايتىنى بەلگىلى بولدى.
قازاقستان تەننيس فەدەراسيانىڭ مالىمەتىنشە، پۋتينسيەۆا پاريجگە ۇشىپ كەلىپ، بەلسەندى تۇردە جاتتىعا باستاعان. الايدا ۋكراينالىق مارتا كوستيۋكپەن بولاتىن ماچ الدىنداعى دايىندىقتا قازاقستاندىق سپورتشى تىزەسىن اۋىرتىپ العان. مەديسينالىق تەكسەرۋدەن وتكەن سوڭ تۋرنيردەن باس تارتۋ تۋرالى شەشىم قابىلداندى.
