Respublica partiiasynyń tóraǵasy, QR Parlament Májilisiniń depýtaty Aidarbek Qojanazarov saiasi uiymnyń ortalyq apparat basshysy men onyń orynbasarlary jáne keńesshileri jańarǵanyn aitady. Transformatsiia barysynda partiianyń teń tóraǵalarynyń da sany qysqardy. Saiasi uiymdaǵy qyzmetinen Rýslan Berdenov pen Nurlan Qoianbaev ketti. Partiianyń bas keńsesi men óńirlerdegi filialdardaǵy ózgeristerge qatysty buǵan deiin BAQ betterinde jazylǵan. Atameken kásipkerler palatasynan Respublica partiiasyna jappai aýysqan mamandar týraly myna siltemeden oqýǵa bolady.
Qaz365.kz tilshisi Májilis kýlýarynda partiia tóraǵasy Aidarbek Qojanazarovtan kadrlyq máseleler jáne saiasi uiymdy qarjylandyrý men olardyń qazirgi músheleriniń sany týraly tikelei surady. Qojanazarov naqty qoiylǵan suraqtardyń barlyǵyna tolyqqandy jaýap bergen joq. Keibirine janama túrde jaýap qatyp, keibirin tipti ainalyp ótti. Qazir Respublica partiiasynyń músheler sany týraly naqty derek joq. Alaida 2023 jylǵy sailaý naýqany kezinde olardy jaqtaýshylar sany jarty million adamǵa jýyqtady degen aqparat bolǵan.
El biýdjetinen biyl partiiaǵa 800 mln teńge qarjy bólingen. Biraq bul qarajat saiasi uiym jumysyn jandandyryp, aimaqtarda belsendilikti arttyrýǵa jete me? Qojanazarov ta atalǵan sommanyń el qazynasynan bólingenin rastaidy. Ol Úkimet bergen qarjy men jarnalar ortalyq apparat qyzmetkerleriniń jalaqysy, keńse jaldaý, filialdardy asyraýmen támam bop qalyp jatyr. Basqa da jobalardy qarjylandyrýǵa aqsha joq, dep aǵynan jarylady.
“Keibir óńirdegi filialdar óz jumysyn jaqsy atqarǵanynyń arqasynda jarna kóptep túse bastady. Mysaly Qaraǵandy, Qostanai oblysyn aitýǵa bolady. Osy 2 óńirde músheler kóbeidi. Tiisinshe jarna mólsheri de ósti. Ózderi ótkizetin sharany ózderi qarjylandyra alady. Ári qarai da men mundai tapsyrmany ózge óńirlerge de qoidym. Biraq bul ózderińdi ózderiń qarjylandyryńdar degen tapsyrma emes. Belsendilikti kúsheitip, músheler sanyn arttyryp, jarna mólsherin ulǵaityńdar degen tarsyrma bar”– deidi depýtat.
Alaida aita ketý kerek partiia alǵash qurylyp, músheler tartqanda jáne sailaý naýqany kezinde jarna túrinde aqsha aýdarý mindettelmeitini aitylǵan. Bul saiasi uiymnyń jarǵysynda da kórsetilgen. Biraq Qojanazarov óńirlerge múshe jinap, olardan jarna jinaýǵa tapsyrma berilgenin aityp otyr. Bul sailaýshylar men partiia músheleriniń aldynda eki sóileý emes pe? Álde bul kópirden ótkenshe qyzyńdy alaiyn dep bastalatyn qazaqy naqyldyń keri me? Negizi partiianyń Ortalyq keńesiniń sheshimimen Korporativtik qor jumys isteidi. QR Ádilet ministrliginde tirkeýden ótken bul qorǵa partiianyń teń tóraǵalary, partiiaǵa múshe iri kásipkerler jáne kez-kelgen partiianyń janashyr músheleri qarjy sala alady. Qordyń naqty qyzmeti men ol jerdegi qarajat kólemi týraly ashyq derekkózderinde málimet joq. Bizdiń tilshiniń osy qor týraly suraǵyn partiia tóraǵasy Aidarbek Qojanazarov jaýapsyz qaldyrdy. Al partiiadaǵy bir jyl burynǵy kadlardy jappai taǵaiyndaýlar men ózgeristerge qatysty jaýap ta jalpylama ári shashyrańqy.
“Ár adam qyzmetke taǵaiyndalǵanda nátije kórsetý emes, mindetin durystap atqarsa boldy. Qoiylǵan maqsattaryna sai jumysyn atqarsa – ár adam óz ornynda durys jumys atqarǵanynyń kórsetkishi. Osy kórsetkishti taǵaiyndalǵan adamdar kórsetip jatyr”,- dep jańyltpashqa uqsas jaýap qatady partiia kóshbasshysy.
Naqty derek-dáieksiz syrǵytpa jaýaptyń sheberi Aidarbek Qojanazarov osy kúni tiimsiz jumysy úshin eń kóp synǵa ushyrap otyrǵan “Atameken” kásipkerlik palatasyna qatysty da oi bólisti. En qyzyǵy – osy “Atameken” palatasyna qatysty partiia ishinde pikir qaishylyǵy baryn saiasi uiym basshysy bilse de bilmeitindei keiip tanytady.
Aitalyq, Respublica partiiasynyń Májilistegi fraktsiia múshesi, depýtat, burynǵy atamekendik Aitýar Qoshmambetov ótken aptada ǵana osy palata jumysy men onyń tóraǵasy Raiymbek Batalovty qatty synǵa alǵan bolatyn. Qojanazarov óziniń protejesi ári partiialasy Qoshmambetovtiń synyna qaramastan palataǵa qatysty jaǵymdy pikir aitady. Tipti ol ózin qazir Atamekenniń prezidiým múshesi ekenin jáne ony jamandaý orynsyz dep qaldy.
“Atameken týraly suraǵyńyzǵa aityp keteiin. Atamekenniń istep jatqan jumysy kásipkerler quqyǵyn qorǵaý esińizde bolsa. Bizdiń partiiamyz da osy baǵytta úlken jumys atqaryp jatyr. Sol sebepten Atamekende alǵan tájiribe bizdiń partiiamyzǵa talap etetin tájiribege óte uiqasady, dep aitýǵa bolady. Sol sebepten Atamekennen biraz adamdardy tarttyq shynymen. Kerek bolsa men de Atamekenniń Qostanai óńirlik keńesiniń tóraǵasy boldym. Qazir Atamekende prezidiým múshesimin. Sol sebepten Atamekendi jamandaý, odan qashqan durys emes dep oilaimyn. Ol mańyzdy mekeme”,– deidi A.Qojanazarov.
BAQ betterinde byltyrdan beri “Atameken” kásipkerler palatasynan Respublica partiiasyna ondaǵan adam jumysqa aýysqany týraly aqparat taraǵanyn joǵaryda eske saldyq. Negizinen óńirlerdegi filialdar, ortalyq apparat jáne Parlamenttegi fraktsiia apparaty qyzmetkerleri kásipkerler palatasynan jumystan ketken mamandardan jasaqtaldy. Bul ózgeristerdi Májilis depýtaty, Respublica partiiasynyń tóraǵasy Aidarbek Qojanazarov ta rastap otyr.
