2025 jyldyń 30 maýsymynan bastap 2026 jyldyń 30 maýsymyna deiin Resei shetel azamattarynyń elge kirý jáne shyǵý tártibine qatysty jańa erejelerdi
synaqtan ótkizedi. Alaida bul talap Qazaqstan azamattaryna mindettelmeidi. Eki el arasyndaǵy vizasyz rejim óz kúshinde qalady, dep habarlaidy Dalanews.kz.
Qazaqstandyqtar neni bilýi kerek?
Jańa ereje boiynsha, Reseige vizasyz kiretin shetel azamattaryna Biryńǵai sáikestendirý jáne aýtentifikatsiia júiesine (ESIA) tirkelip, ruID mobildi qosymshasy arqyly elge kelý týraly aldyn ala ótinish berýge usynys jasalady.
Qazaqstan azamattary úshin bul júiege tirkelý mindetti emes. Olar burynǵydai vizasyz, eshqandai qosymshaǵa tirkelmei Reseige kire alady. Sonymen qatar tirkeýden bas tartý shekaradan ótýge esh kedergi keltirmeidi.
ruID júiesiniń artyqshylyqtary qandai?
Júiege tirkelý arqyly birneshe qyzmetke onlain túrde qol jetkizýge múmkindik ashylady:
• Reseilik memlekettik qyzmetterdi paidalaný
• Reseidiń SIM-kartasyn rásimdeý
• Aiyppuldar men salyqtardy onlain tóleý
ruID júiesine qalai tirkelýge bolady?
1. ruID qosymshasyn júktep alyńyz (2025 jyldyń 24 maýsymynan bastap qoljetimdi);
2. “Gosýslýgi” akkaýnty arqyly tirkelińiz nemese júiege kirińiz;
3. Ótinishte mynalardy kórsetińiz:
• qai elden shyǵatynyńyzdy;
• sapar maqsaty men merzimin;
• Resei ishinde baratyn óńirlerdi;
• eger bala erip júrse – onyń málimetterin (ata-ananyń qatysýymen).
4. Biometriialyq derekterdi tapsyryńyz:
• bet-álpet fotosy;
• tólqujat fotosy;
• daýys jazbasy.
Eger sizdiń biometriiańyz Reseide burynnan tirkelgen bolsa, onda tek foto júktep, Gosýslýgi arqyly ótinish jiberýge bolady.
Ótinish sapardan 72 saǵat buryn, biraq 90 kúnnen erte emes merzimde berilýi tiis. Al shuǵyl jaǵdailarda (mysaly, jaqyn týysynyń qaitys bolýy nemese aýyr dertke shaldyǵýy) qujattarmen rastalǵan jaǵdaida 4 saǵat ishinde ótinish berýge bolady.
Shekarada ne isteý kerek?
ruID júiesi arqyly tirkelgen jaǵdaida, shekaradan ótý kezinde ótinishte kórsetilgen qujatty kórsetý kerek. Qazaqstan azamattary bul júiege tirkelmese de, burynǵydai kedergisiz shekaradan óte alady.
Elge kirgen soń 10 kún ishinde Biryńǵai biometriialyq júiede (EBJ) bank bólimsheleri arqyly tirkeýdi tolyq aiaqtaýǵa bolady.
ruID júiesiniń jumysy jáne egjei-tegjeili aqparat Reseidiń Tsifrlyq damý ministrliginiń resmi saitynda qoljetimdi. Al vizamen, sonyń ishinde elektrondyq vizamen kirý tártibi ózgerissiz qalady.
