2025 جىلدىڭ 30 ماۋسىمىنان باستاپ 2026 جىلدىڭ 30 ماۋسىمىنا دەيىن رەسەي شەتەل ازاماتتارىنىڭ ەلگە كىرۋ جانە شىعۋ تارتىبىنە قاتىستى جاڭا ەرەجەلەردى
سىناقتان وتكىزەدى. الايدا بۇل تالاپ قازاقستان ازاماتتارىنا مىندەتتەلمەيدى. ەكى ەل اراسىنداعى ۆيزاسىز رەجيم ءوز كۇشىندە قالادى، دەپ حابارلايدى Dalanews.kz.
قازاقستاندىقتار نەنى ءبىلۋى كەرەك؟
جاڭا ەرەجە بويىنشا، رەسەيگە ۆيزاسىز كىرەتىن شەتەل ازاماتتارىنا ءبىرىڭعاي سايكەستەندىرۋ جانە اۋتەنتيفيكاسيا جۇيەسىنە (ەسيا) تىركەلىپ، ruID ءموبيلدى قوسىمشاسى ارقىلى ەلگە كەلۋ تۋرالى الدىن الا ءوتىنىش بەرۋگە ۇسىنىس جاسالادى.
قازاقستان ازاماتتارى ءۇشىن بۇل جۇيەگە تىركەلۋ مىندەتتى ەمەس. ولار بۇرىنعىداي ۆيزاسىز، ەشقانداي قوسىمشاعا تىركەلمەي رەسەيگە كىرە الادى. سونىمەن قاتار تىركەۋدەن باس تارتۋ شەكارادان وتۋگە ەش كەدەرگى كەلتىرمەيدى.
ruID جۇيەسىنىڭ ارتىقشىلىقتارى قانداي؟
جۇيەگە تىركەلۋ ارقىلى بىرنەشە قىزمەتكە ونلاين تۇردە قول جەتكىزۋگە مۇمكىندىك اشىلادى:
• رەسەيلىك مەملەكەتتىك قىزمەتتەردى پايدالانۋ
• رەسەيدىڭ SIM-كارتاسىن راسىمدەۋ
• ايىپپۇلدار مەن سالىقتاردى ونلاين تولەۋ
ruID جۇيەسىنە قالاي تىركەلۋگە بولادى؟
1. ruID قوسىمشاسىن جۇكتەپ الىڭىز (2025 جىلدىڭ 24 ماۋسىمىنان باستاپ قولجەتىمدى)؛
2. “گوسۋسلۋگي” اككاۋنتى ارقىلى تىركەلىڭىز نەمەسە جۇيەگە كىرىڭىز؛
3. وتىنىشتە مىنالاردى كورسەتىڭىز:
• قاي ەلدەن شىعاتىنىڭىزدى؛
• ساپار ماقساتى مەن مەرزىمىن؛
• رەسەي ىشىندە باراتىن وڭىرلەردى؛
• ەگەر بالا ەرىپ جۇرسە – ونىڭ مالىمەتتەرىن (اتا-انانىڭ قاتىسۋىمەن).
4. بيومەتريالىق دەرەكتەردى تاپسىرىڭىز:
• بەت-الپەت فوتوسى؛
• ءتولقۇجات فوتوسى؛
• داۋىس جازباسى.
ەگەر ءسىزدىڭ بيومەترياڭىز رەسەيدە بۇرىننان تىركەلگەن بولسا، وندا تەك فوتو جۇكتەپ، گوسۋسلۋگي ارقىلى ءوتىنىش جىبەرۋگە بولادى.
ءوتىنىش ساپاردان 72 ساعات بۇرىن، ءبىراق 90 كۇننەن ەرتە ەمەس مەرزىمدە بەرىلۋى ءتيىس. ال شۇعىل جاعدايلاردا (مىسالى، جاقىن تۋىسىنىڭ قايتىس بولۋى نەمەسە اۋىر دەرتكە شالدىعۋى) قۇجاتتارمەن راستالعان جاعدايدا 4 ساعات ىشىندە ءوتىنىش بەرۋگە بولادى.
شەكارادا نە ىستەۋ كەرەك؟
ruID جۇيەسى ارقىلى تىركەلگەن جاعدايدا، شەكارادان ءوتۋ كەزىندە وتىنىشتە كورسەتىلگەن قۇجاتتى كورسەتۋ كەرەك. قازاقستان ازاماتتارى بۇل جۇيەگە تىركەلمەسە دە، بۇرىنعىداي كەدەرگىسىز شەكارادان وتە الادى.
ەلگە كىرگەن سوڭ 10 كۇن ىشىندە ءبىرىڭعاي بيومەتريالىق جۇيەدە (ەبج) بانك بولىمشەلەرى ارقىلى تىركەۋدى تولىق اياقتاۋعا بولادى.
ruID جۇيەسىنىڭ جۇمىسى جانە ەگجەي-تەگجەيلى اقپارات رەسەيدىڭ سيفرلىق دامۋ مينيسترلىگىنىڭ رەسمي سايتىندا قولجەتىمدى. ال ۆيزامەن، سونىڭ ىشىندە ەلەكتروندىق ۆيزامەن كىرۋ ءتارتىبى وزگەرىسسىز قالادى.
