Bul jóninde Resei memlekettik dýmasynyń depýtaty, partiianyń bas keńesi hatshysynyń orynbasary Aleksandr Hinshtein óziniń telegram-arnasynda jazdy.
Onyń aitýynsha, jobada myna kategoriialarǵa jatqyzylǵan sheteldikter men azamattyǵy joq adamdardyń Resei aýmaǵyna kirýine tyiym salynady:
- Ulttyq, násildik, dini jáne tildik negizde basqalardy qorlap, jurttyń ashý-yzasyn týǵyzatyndar;
- Otan qorǵaýshylar týraly estelikterdi, uly otan soǵysy ardagerleriniń ar-namysy men qadir-qasietin qorlaǵan, Reseidiń áskeri dańq simvoldaryn mazaqtaǵan, áskeri zirattar men eskertkishterdi búldirgen adamdar;
- SSSR-dyń uly otan soǵysy kezindegi áreketi týraly kórineý jalǵan aqparat taratqandar;
- Natsistik, ekstremistik atribýt pen simvoldardy ázirlep, nasihattap, ony kórsetip júretinder;
- Natsisterdiń qylmysyn qoldaityndar.
Bul joba boiynsha "Resei Federatsiiasy aýmaǵynan shyǵý jáne Resei Federatsiiasy aýmaǵyna kirý týraly" federatsiia zańyna ózgeris engizý kózdelgen. Depýtattyń aitýynsha, ókiletti organ retinde Resei ishki ister ministrligi bul bastamany qoldaǵan.
Depýtat Hinshteinniń aitýynsha, mundai zań jobasyn ázirleýge "postsovettik keńistiktegi ashyq rýsofobiialyq áreketter" sebep bolǵan. Ol naqty qandai oqiǵany meńzeitinin taratyp aitpady.
Mundai zań bolmasa da, Reseidiń ishki ister ministrligi dúkender men memlekettik mekemelerde qyzmetkerlerdiń qazaq tilin meńgerýin tekserip video túsirip júrgen Qazaqstan azamaty Qýat Ahmetovtiń Reseige kirýine 50 jylǵa tyiym saldy. Buǵan qosa Bishkektegi saýda ortalyǵynda qyrǵyzsha sóilemegen qyzmetkerdi kalkýliatormen urǵan Qyrǵyzstan azamatynyń Reseige kirýine on jylǵa shek qoiyldy.
Ótken aptada Resei ishki ister ministrligi "ult arazdyǵyn qozdyratyn málimdeme jasaǵany úshin" Ázerbaijannyń Belarýstegi burynǵy elshisi Isfandiiar Vagabzadeniń Reseige kirýine 40 jylǵa tyiym saldy.
Vagabzade KANAL13 telearnasynda postsovettik elderdiń aýmaqtyq tutastyǵyna shák keltirip jii málimdeme jasaityn Reseidegi LDPR partiiasynyń basshysy Vladimir Jirinovskiidi "kári esek" dep ataǵan jáne onyń "ózi de, ulty da shoshqa siiaqty sasyq" degen.
Hinshteinniń aitýynsha, Reseige kirý quqyǵynan aiyrylatyny óz aldyna, "rýsofob málimdeme jasaǵan" ár adamnyń áreketine sol eldiń biligi quqyqtyq baǵa berýi tiis.
Ol sondai-aq Resei syrtqy ister ministri Sergei Lavrovtyń Qazaqstan syrtqy ister ministri Muhtar Tileýberdi men Qyrǵyzstan syrtqy ister ministri Rýslan Qazaqbaevpen kezdeskenin, ministrlerdiń turmystyq ultshyldyqqa qarsy turý týraly aitqanyn eske saldy.
Derekkóz: azattyq.org
https://dalanews.kz/sadak/66731-til-maydany-ultshyldyqty-qozdyrmayyq
