Almaty oblysynda Jyr alyby Jambyl Jabaevtyń 180 jyldyq mereitoiy Kókbastaý atyrabyn dýmanǵa bólep, dúrkirep ótýde. Taý baýraiynda 50-ge jýyq aqshańqai kiiz úi tigilip, ónerpazdar ulttyq aspaptardan jyr tógiltip, salt-dástúrdi aishyqtaityn kórinister jinalǵan qaýymnyń rýhyn oiatty. Kórkemónerpazdar men qolóner sheberleriniń, asyltuqymdy jylqy men tazynyń kórmesi uiymdastyrylyp, sportshylar ulttyq sport túrlerinen synǵa túsip jatyr. Sarqylmas jyr bulaǵyna ainalǵan uly tulǵanyń shyǵarmashylyq murasy keńinen nasihattalyp, aitys óneriniń mán-mańyzy keńinen dáriptelýde. Abdolla Qarsaqbaevtyń 100 jyldyq mereitoiy da nazardan tys qalmai, kinorejisserdiń týyndylarynan úzindiler qoiylyp, teatrlandyrylǵan kórinis kórermen nazaryna usynyldy, dep habarlaidy dalanews.kz Almaty oblysy ákiminiń baspasóz qyzmetine silteme jasap.
Dýmandy merekege mádeniet jáne qoǵam qairatkerleri, jyrshy-termeshiler, aitysker aqyndar, oblys basshylyǵy, elimizdiń ár óńirinen kelgen qonaqtar men jergilikti turǵyndar qatysty.
Alǵash bolyp sóz alǵan QR Prezidentiniń keńesshisi Málik Otarbaev toiǵa jinalǵan halyqqa Memleket basshysy Qasym-Jomart Toqaevtyń quttyqtaý hatyn oqyp berdi.
«Jambyl Jabaev – ult mádenietinde erekshe orny bar tarihi tulǵa, qazaq ádebietiniń asa kórnekti ókili. Áigili jyrshy shoqtyǵy biik shyǵarmalary arqyly otanshyldyq pen yntymaq, erlik pen eldik, adaldyq pen ádildik sekildi myzǵymas qundylyqtardy keńinen dáriptedi. Halqymyzdyń birtýar perzenti aitys óneriniń órisin keńeitýge, epikalyq dástúrdi jańǵyrtýǵa, qazaq-qyrǵyz ádebi bailanysyn nyǵaitýǵa ólsheýsiz úles qosty. Óz dáýiriniń tynys-tirshiligin asqan sheberlikpen sýrettep, jurttyń ystyq yqylasyna bólendi. «HH ǵasyrdyń Gomeri» atanǵan uly aqynnyń týyndylary kóptegen shet tiline aýdarylyp, barsha adamzatqa ortaq qazynaǵa ainaldy. Qos ǵasyrdyń kýási bolǵan jyr alybynyń mol murasy áli talai urpaqqa rýhani azyq bolary sózsiz», – delingen hatta.
Almaty oblysynyń ákimi Shyńǵys Árinov óz sózinde Jambyl Jabaevtyń qazaq rýhaniiaty men aqyndyq ónerinde alatyn ornyna toqtaldy.
«Jambyl – qazaqtyń sóz ónerinde airyqsha orny bar dara tulǵa. Ataqty Súiinbai Aronulynan bata alǵan aqyn ǵasyrǵa jýyq ǵumyrynda eldiń muńyn muńdap, joǵyn joqtap, ult muratyn jyryna arqaý etti. Jambyl babamyzdyń esimi ýaqyt ótken saiyn halyqpen birge jasai beretin rýhani qundylyq. Ýaqyt ótedi, urpaq almasady. Biraq elge qyzmet etken, halyqtyń sózin sóilegen tulǵalardyń orny árqashan joǵary. «Taý alystaǵan saiyn biiktei túsedi» demekshi, jyldar ótken saiyn Jambyldyń tulǵasy da tereńirek tanyla túsetini sózsiz. Al siz ben bizdiń paryzymyz – babadan qalǵan asyl murany kózdiń qarashyǵyndai saqtap, keler urpaqqa jetkizý.Jambyl murasy – ult rýhaniiatynyń asyl qazynasy. Jyr alybynyń ósieti men ónegesi urpaq sanasynda jańǵyryp, máńgilik jasai bersin», – dedi Shyńǵys Sairanuly.
Aita keteiik, Jambyl Jabaevtyń mereitoiyna arnalǵan sharalar legi jyl basynan beri tolastaǵan joq. Elimizdiń túkpir-túkpirindegi, halyqaralyq deńgeidegi taǵylymdy keshterde aqynnyń ómiri men shyǵarmashylyǵy keńinen nasihattaldy. Máselen, Beijińde «Jambyl – ǵasyr aqyny» atty taǵylymdy shara ótse, Súiinbai atyndaǵy memlekettik akademiialyq filarmoniiasynda «Ata tolǵaýy» atty saltanatty kontsert uiymdastyryldy. Kúni keshe Uzynaǵash aýylyndaǵy halyqaralyq aqyndar aitysynda sóz zergerleri básekege tústi. Júirikterdiń ónerin Qazaqstannyń Halyq jazýshysy, «Qurmet», «Parasat», «Otan» ordenderiniń iegeri Júrsin Erman bastaǵan qazylar alqasy baǵamdap, sýyrypsalmalyq sheberligine tórelik etti. Jarys qorytyndysynda bas júldeni qyzylordalyq Meiirbek Sultanhan jeńip alyp, sýjańa avtokóliktiń iesi atandy. Birinshi oryndy Qyrǵyz elinen kelgen Kýtman Sadybakasov enshiledi. Ekinshi oryn Qazyret Berdihan men Nurbol Jaýynbaevqa buiyrsa, úshinshi oryndy Bolat Ahmetov pen Ularbek Minathan ózara bólisti. Al búgin mereitoi Jambyl aýdanyndaǵy Kókbastaý aýylynda eń aýqymdy sharamen jalǵasyn tapty. Dúbirli toiǵa 25 myńǵa jýyq halyq jinaldy.
