بۇل جونىندە رەسەي مەملەكەتتىك دۋماسىنىڭ دەپۋتاتى، پارتيانىڭ باس كەڭەسى حاتشىسىنىڭ ورىنباسارى الەكساندر حينشتەين ءوزىنىڭ تەلەگرام-ارناسىندا جازدى.
ونىڭ ايتۋىنشا، جوبادا مىنا كاتەگوريالارعا جاتقىزىلعان شەتەلدىكتەر مەن ازاماتتىعى جوق ادامداردىڭ رەسەي اۋماعىنا كىرۋىنە تىيىم سالىنادى:
- ۇلتتىق، ناسىلدىك، ءدىني جانە تىلدىك نەگىزدە باسقالاردى قورلاپ، جۇرتتىڭ اشۋ-ىزاسىن تۋعىزاتىندار؛
- وتان قورعاۋشىلار تۋرالى ەستەلىكتەردى، ۇلى وتان سوعىسى ارداگەرلەرىنىڭ ار-نامىسى مەن قادىر-قاسيەتىن قورلاعان، رەسەيدىڭ اسكەري داڭق سيمۆولدارىن مازاقتاعان، اسكەري زيراتتار مەن ەسكەرتكىشتەردى بۇلدىرگەن ادامدار؛
- سسسر-دىڭ ۇلى وتان سوعىسى كەزىندەگى ارەكەتى تۋرالى كورىنەۋ جالعان اقپارات تاراتقاندار؛
- ناسيستىك، ەكسترەميستىك اتريبۋت پەن سيمۆولداردى ازىرلەپ، ناسيحاتتاپ، ونى كورسەتىپ جۇرەتىندەر؛
- ناسيستەردىڭ قىلمىسىن قولدايتىندار.
بۇل جوبا بويىنشا "رەسەي فەدەراسياسى اۋماعىنان شىعۋ جانە رەسەي فەدەراسياسى اۋماعىنا كىرۋ تۋرالى" فەدەراسيا زاڭىنا وزگەرىس ەنگىزۋ كوزدەلگەن. دەپۋتاتتىڭ ايتۋىنشا، وكىلەتتى ورگان رەتىندە رەسەي ىشكى ىستەر مينيسترلىگى بۇل باستامانى قولداعان.
دەپۋتات حينشتەيننىڭ ايتۋىنشا، مۇنداي زاڭ جوباسىن ازىرلەۋگە "پوستسوۆەتتىك كەڭىستىكتەگى اشىق رۋسوفوبيالىق ارەكەتتەر" سەبەپ بولعان. ول ناقتى قانداي وقيعانى مەڭزەيتىنىن تاراتىپ ايتپادى.
مۇنداي زاڭ بولماسا دا، رەسەيدىڭ ىشكى ىستەر مينيسترلىگى دۇكەندەر مەن مەملەكەتتىك مەكەمەلەردە قىزمەتكەرلەردىڭ قازاق ءتىلىن مەڭگەرۋىن تەكسەرىپ ۆيدەو ءتۇسىرىپ جۇرگەن قازاقستان ازاماتى قۋات احمەتوۆتىڭ رەسەيگە كىرۋىنە 50 جىلعا تىيىم سالدى. بۇعان قوسا بىشكەكتەگى ساۋدا ورتالىعىندا قىرعىزشا سويلەمەگەن قىزمەتكەردى كالكۋلياتورمەن ۇرعان قىرعىزستان ازاماتىنىڭ رەسەيگە كىرۋىنە ون جىلعا شەك قويىلدى.
وتكەن اپتادا رەسەي ىشكى ىستەر مينيسترلىگى "ۇلت ارازدىعىن قوزدىراتىن مالىمدەمە جاساعانى ءۇشىن" ازەربايجاننىڭ بەلارۋستەگى بۇرىنعى ەلشىسى يسفانديار ۆاگابزادەنىڭ رەسەيگە كىرۋىنە 40 جىلعا تىيىم سالدى.
ۆاگابزادە KANAL13 تەلەارناسىندا پوستسوۆەتتىك ەلدەردىڭ اۋماقتىق تۇتاستىعىنا شاك كەلتىرىپ ءجيى مالىمدەمە جاسايتىن رەسەيدەگى لدپر پارتياسىنىڭ باسشىسى ۆلاديمير جيرينوۆسكييدى "كارى ەسەك" دەپ اتاعان جانە ونىڭ "ءوزى دە، ۇلتى دا شوشقا سياقتى ساسىق" دەگەن.
حينشتەيننىڭ ايتۋىنشا، رەسەيگە كىرۋ قۇقىعىنان ايىرىلاتىنى ءوز الدىنا، "رۋسوفوب مالىمدەمە جاساعان" ءار ادامنىڭ ارەكەتىنە سول ەلدىڭ بيلىگى قۇقىقتىق باعا بەرۋى ءتيىس.
ول سونداي-اق رەسەي سىرتقى ىستەر ءمينيسترى سەرگەي لاۆروۆتىڭ قازاقستان سىرتقى ىستەر ءمينيسترى مۇحتار تىلەۋبەردى مەن قىرعىزستان سىرتقى ىستەر ءمينيسترى رۋسلان قازاقبايەۆپەن كەزدەسكەنىن، مينيسترلەردىڭ تۇرمىستىق ۇلتشىلدىققا قارسى تۇرۋ تۋرالى ايتقانىن ەسكە سالدى.
دەرەككوز: azattyq.org
https://dalanews.kz/sadak/66731-til-maydany-ultshyldyqty-qozdyrmayyq
