Resei óz aýmaǵyna jasalǵan zymyran soqqylaryna bailanysty UQShU-dan kómek suraǵan joq.Bul týraly keshe Reseidiń TASS aqparat agenttigine bergen suhbatynda Ujymdyq qaýipsizdik sharty uiymynyń (UQShU) bas hatshysy Imanǵali Tasmaǵambetov málimdedi, - dep habarlaidy Dalanews.kz.
Resei óz aýmaǵyna jasalǵan zymyran soqqylaryna bailanysty UQShU-dan kómek suramaǵan
Bul týraly keshe Reseidiń TASS aqparat agenttigine bergen suhbatynda Ujymdyq qaýipsizdik sharty uiymynyń (UQShU) bas hatshysy Imanǵali Tasmaǵambetov málimdedi.
– Ujymdyq qaýipsizdik sharty sheńberinde kómek kórsetý, sonyń ishinde áskeri kómek, múshe memlekettiń ótinishi nemese suraýy boiynsha júzege asyrylady. Bul sharttyń normalary buǵan deiin tájiribede qoldanylǵany belgili. Qazirgi ýaqytta Resei tarapynan mundai ótinish túsken joq, – dedi ol.
Imanǵali Tasmaǵambetov búgin Astanada ótip jatqan UQShU sammitiniń kún tártibinde Resei aýmaǵyna ATACMS zymyrandary arqyly jasalǵan soqqylarǵa qatysty arnaiy másele qaralmaitynyn atap ótti.
– Sizder keltirgen formýlirovkada bul másele jeke kún tártibinde joq. UQShU-nyń jaýapkershilik aimaǵy men shekaralaryndaǵy jaǵdaidy talqylaý josparlanǵan, bul uiymnyń úsh aimaǵyn: shyǵys-eýropalyq, kavkazdyq jáne ortalyq-aziialyq óńirlerdi qamtidy. Memleket basshylary qazirgi zamanda UQShU-ǵa múshe elderdiń qaýipsizdigin qamtamasyz etýge qatysty barlyq máselelerdi talqylaidy, – dep jaýap berdi ol tilshiniń suraǵyna.
Ýkraina tarapynan jasalǵan zymyran soqqylaryna Reseidiń "Oreshnik" keshenimen jaýap berýine qatysty Tasmaǵambetov onyń qoldanylý tájiribesi UQShU aiasynda zerttelip jatqanyn aitty.
– UQShU qazirgi zamanǵy qarýlardy qoldaný tájiribesin, synaqtaryn, damý perspektivalaryn zertteidi. Bul bizdiń jumysymyzdyń ajyramas bóligi, – dep túsindirdi Imanǵali Tasmaǵambetov.
Eske salaiyq, búgin Astanada Memleket basshysy Qasym-Jomart Toqaevtyń tóraǵalyǵymen UQShU sammiti bastaldy.
Astanada Syrtqy ister ministrleri keńesiniń, Qorǵanys ministrleri keńesiniń jáne Qaýipsizdik keńesteri hatshylary komitetiniń birlesken otyrysy, sondai-aq UQShU Ujymdyq qaýipsizdik keńesiniń otyrysy ótedi.
Is-sharalarǵa UQShU Bas hatshysy Imanǵali Tasmaǵambetov qatysady.
Ujymdyq qaýipsizdik aimaqtaryndaǵy áskeri-saiasi jaǵdai boiynsha pikir almasý, UQShU aiasyndaǵy yntymaqtastyq nátijelerin jáne ujymdyq qaýipsizdik júiesin odan ári damytý perspektivalaryn talqylaý kózdelip otyr. Uly Otan soǵysyndaǵy Jeńistiń 80 jyldyǵyn birlesip merekeleýge daiyndyq máselelerine erekshe nazar aýdarylady.
Qyrǵyz Respýblikasy 2025 jyly Uiymǵa tóraǵalyq etýdiń basymdyqtary týraly aqparat beredi dep josparlanyp otyr.
Sondai-aq sammit qorytyndysy boiynsha taraptar birqatar qujatqa qol qoiýdy josparlap otyr.
