رەسەي ءوز اۋماعىنا جاسالعان زىمىران سوققىلارىنا بايلانىستى ۇقشۇ-دان كومەك سۇراعان جوق.بۇل تۋرالى كەشە رەسەيدىڭ تاسس اقپارات اگەنتتىگىنە بەرگەن سۇحباتىندا ۇجىمدىق قاۋىپسىزدىك شارتى ۇيىمىنىڭ (ۇقشۇ) باس حاتشىسى يمانعالي تاسماعامبەتوۆ مالىمدەدى، - دەپ حابارلايدى Dalanews.kz.

رەسەي ءوز اۋماعىنا جاسالعان زىمىران سوققىلارىنا بايلانىستى ۇقشۇ-دان كومەك سۇراماعان

بۇل تۋرالى كەشە رەسەيدىڭ تاسس اقپارات اگەنتتىگىنە بەرگەن سۇحباتىندا ۇجىمدىق قاۋىپسىزدىك شارتى ۇيىمىنىڭ (ۇقشۇ) باس حاتشىسى يمانعالي تاسماعامبەتوۆ مالىمدەدى.

– ۇجىمدىق قاۋىپسىزدىك شارتى شەڭبەرىندە كومەك كورسەتۋ، سونىڭ ىشىندە اسكەري كومەك، مۇشە مەملەكەتتىڭ ءوتىنىشى نەمەسە سۇراۋى بويىنشا جۇزەگە اسىرىلادى. بۇل شارتتىڭ نورمالارى بۇعان دەيىن تاجىريبەدە قولدانىلعانى بەلگىلى. قازىرگى ۋاقىتتا رەسەي تاراپىنان مۇنداي ءوتىنىش تۇسكەن جوق، – دەدى ول.

يمانعالي تاسماعامبەتوۆ بۇگىن استانادا ءوتىپ جاتقان ۇقشۇ ءسامميتىنىڭ كۇن تارتىبىندە رەسەي اۋماعىنا ATACMS زىمىراندارى ارقىلى جاسالعان سوققىلارعا قاتىستى ارنايى ماسەلە قارالمايتىنىن اتاپ ءوتتى.

– سىزدەر كەلتىرگەن فورمۋليروۆكادا بۇل ماسەلە جەكە كۇن تارتىبىندە جوق. ۇقشۇ-نىڭ جاۋاپكەرشىلىك ايماعى مەن شەكارالارىنداعى جاعدايدى تالقىلاۋ جوسپارلانعان، بۇل ۇيىمنىڭ ءۇش ايماعىن: شىعىس-ەۋروپالىق، كاۆكازدىق جانە ورتالىق-ازيالىق وڭىرلەردى قامتيدى. مەملەكەت باسشىلارى قازىرگى زاماندا ۇقشۇ-عا مۇشە ەلدەردىڭ قاۋىپسىزدىگىن قامتاماسىز ەتۋگە قاتىستى بارلىق ماسەلەلەردى تالقىلايدى، – دەپ جاۋاپ بەردى ول ءتىلشىنىڭ سۇراعىنا.

ۋكراينا تاراپىنان جاسالعان زىمىران سوققىلارىنا رەسەيدىڭ "ورەشنيك" كەشەنىمەن جاۋاپ بەرۋىنە قاتىستى تاسماعامبەتوۆ ونىڭ قولدانىلۋ تاجىريبەسى ۇقشۇ اياسىندا زەرتتەلىپ جاتقانىن ايتتى.

– ۇقشۇ قازىرگى زامانعى قارۋلاردى قولدانۋ تاجىريبەسىن، سىناقتارىن، دامۋ پەرسپەكتيۆالارىن زەرتتەيدى. بۇل ءبىزدىڭ جۇمىسىمىزدىڭ اجىراماس بولىگى، – دەپ ءتۇسىندىردى يمانعالي تاسماعامبەتوۆ.

ەسكە سالايىق، بۇگىن استانادا مەملەكەت باسشىسى قاسىم-جومارت توقايەۆتىڭ توراعالىعىمەن ۇقشۇ ءسامميتى باستالدى.

استانادا سىرتقى ىستەر مينيسترلەرى كەڭەسىنىڭ، قورعانىس مينيسترلەرى كەڭەسىنىڭ جانە قاۋىپسىزدىك كەڭەستەرى حاتشىلارى كوميتەتىنىڭ بىرلەسكەن وتىرىسى، سونداي-اق ۇقشۇ ۇجىمدىق قاۋىپسىزدىك كەڭەسىنىڭ وتىرىسى وتەدى.

ءىس-شارالارعا ۇقشۇ باس حاتشىسى يمانعالي تاسماعامبەتوۆ قاتىسادى.

ۇجىمدىق قاۋىپسىزدىك ايماقتارىنداعى اسكەري-ساياسي جاعداي بويىنشا پىكىر الماسۋ، ۇقشۇ اياسىنداعى ىنتىماقتاستىق ناتيجەلەرىن جانە ۇجىمدىق قاۋىپسىزدىك جۇيەسىن ودان ءارى دامىتۋ پەرسپەكتيۆالارىن تالقىلاۋ كوزدەلىپ وتىر. ۇلى وتان سوعىسىنداعى جەڭىستىڭ 80 جىلدىعىن بىرلەسىپ مەرەكەلەۋگە دايىندىق ماسەلەلەرىنە ەرەكشە نازار اۋدارىلادى.

قىرعىز رەسپۋبليكاسى 2025 جىلى ۇيىمعا ءتوراعالىق ەتۋدىڭ باسىمدىقتارى تۋرالى اقپارات بەرەدى دەپ جوسپارلانىپ وتىر.

سونداي-اق سامميت قورىتىندىسى بويىنشا تاراپتار ءبىرقاتار قۇجاتقا قول قويۋدى جوسپارلاپ وتىر.