Wildberries Qazaqstan naryǵyna tolyqtai kirip jumys isteýi úshin 30 jylǵa deiin salyqtan bosatýdy jáne Qazaqstanda qoimalaryn salý úshin kómek kórsetýdi surapty. Muny QR Syrtyq ister ministriniń orynbasary Almas Aidarov málim etti.
– Qazaqstan naryǵyna álemge tanylǵan kompaniialardyń kelip jumys istegeni el ekonomikasy úshin paidaly. Birer jyldan beri Wildberries kompaniiasynyń elimizde jumys isteýi úshin kelissózder júrgizdik. Ókinishke orai, Wildberries alǵashqy kelissózde Qazaqstan naryǵyna kirgen sátte ózderin 30 jylǵa deiin salyqtan bosatyp, Qazaqstan aýmaǵynda qoimalar salýǵa kómek kórsetýin talap etti. Árine, atqarýshy bilik sheteldik kompaniiaǵa mundai jeńildik jasai almaityny belgili. Sondyqtan bizder olardyń usynysynan birden bas tarttyq, – deidi Almas Aidarov.
Syrtqy ister ministriniń orynbasary Wildberries-ten bólek Apple kompaniiasymen Almaty qalasynda saýda-sattyq boiynsha resmi ókildigin ashý boiynsha kelissózder júrgizip jatqandaryn tilge tiek etti.
– Dál qazir Apple kompaniiasyna Qazaqstan óndiristik bazasyn ashý týrasynda usynys aitý orynsyz. Óitkeni bizdiń elimizde básekege qabiletti smartfon shyǵaratyn is-tájiribe men bilikti mamandar múlde joq, – dedi Almas Aidarov.
Al Apple kompaniiasy Qazaqstanda saýda-sattyq boiynsha resmi ókildigin ashýǵa qatysty usynysty qarastyryp, sheshim qabyldaý úshin 3-4 jyl kerek eken. Biraq Apple Reseidiń Wildberries kompaniiasy sekildi adam aitsa nanǵysyz jeńildikterdi talap etpegen.
30 jyl boiyna Reseidiń kompaniialar Qazaqstandy mai shelpek sanap kelgeni jasyryn emes. Olar qalǵan jeńildigin alyp, elimizdiń saýyn siyrǵa ainaldyrdy. Endi mundai jalpaqshesheilikke jol bermeýmiz kerek.
