Wildberries قازاقستان نارىعىنا تولىقتاي كىرىپ جۇمىس ىستەۋى ءۇشىن 30 جىلعا دەيىن سالىقتان بوساتۋدى جانە قازاقستاندا قويمالارىن سالۋ ءۇشىن كومەك كورسەتۋدى سۇراپتى. مۇنى ق ر سىرتىق ىستەر ءمينيسترىنىڭ ورىنباسارى الماس ايداروۆ ءمالىم ەتتى.
– قازاقستان نارىعىنا الەمگە تانىلعان كومپانيالاردىڭ كەلىپ جۇمىس ىستەگەنى ەل ەكونوميكاسى ءۇشىن پايدالى. بىرەر جىلدان بەرى Wildberries كومپانياسىنىڭ ەلىمىزدە جۇمىس ىستەۋى ءۇشىن كەلىسسوزدەر جۇرگىزدىك. وكىنىشكە وراي، Wildberries العاشقى كەلىسسوزدە قازاقستان نارىعىنا كىرگەن ساتتە وزدەرىن 30 جىلعا دەيىن سالىقتان بوساتىپ، قازاقستان اۋماعىندا قويمالار سالۋعا كومەك كورسەتۋىن تالاپ ەتتى. ارينە، اتقارۋشى بيلىك شەتەلدىك كومپانياعا مۇنداي جەڭىلدىك جاساي المايتىنى بەلگىلى. سوندىقتان بىزدەر ولاردىڭ ۇسىنىسىنان بىردەن باس تارتتىق، – دەيدى الماس ايداروۆ.
سىرتقى ىستەر ءمينيسترىنىڭ ورىنباسارى Wildberries-تەن بولەك Apple كومپانياسىمەن الماتى قالاسىندا ساۋدا-ساتتىق بويىنشا رەسمي وكىلدىگىن اشۋ بويىنشا كەلىسسوزدەر جۇرگىزىپ جاتقاندارىن تىلگە تيەك ەتتى.
– ءدال ءقازىر Apple كومپانياسىنا قازاقستان وندىرىستىك بازاسىن اشۋ تۋراسىندا ۇسىنىس ايتۋ ورىنسىز. ويتكەنى ءبىزدىڭ ەلىمىزدە باسەكەگە قابىلەتتى سمارتفون شىعاراتىن ىس-تاجىريبە مەن بىلىكتى ماماندار مۇلدە جوق، – دەدى الماس ايداروۆ.
ال Apple كومپانياسى قازاقستاندا ساۋدا-ساتتىق بويىنشا رەسمي وكىلدىگىن اشۋعا قاتىستى ۇسىنىستى قاراستىرىپ، شەشىم قابىلداۋ ءۇشىن 3-4 جىل كەرەك ەكەن. ءبىراق Apple رەسەيدىڭ Wildberries كومپانياسى سەكىلدى ادام ايتسا نانعىسىز جەڭىلدىكتەردى تالاپ ەتپەگەن.
30 جىل بويىنا رەسەيدىڭ كومپانيالار قازاقستاندى ماي شەلپەك ساناپ كەلگەنى جاسىرىن ەمەس. ولار قالعان جەڭىلدىگىن الىپ، ەلىمىزدىڭ ساۋىن سيىرعا اينالدىردى. ەندى مۇنداي جالپاقشەشەيلىككە جول بەرمەۋمىز كەرەك.
