Reseı «Azıa-Avto» avtomobıl zaýytynyń eks-top-menedjerleri Anatolıı Balýshkın men Erik Saǵymbaevty Qazaqstanǵa qaıtarýǵa kelispeı otyr, dep habarlaıdy Dalanews.kz Qaztag agenttigine silteme jasap.
Qazaqstan Bas prokýratýrasynyń túsindirýinshe, basqa elde júrgen Reseı azamattaryna qatysty qazaqstandyq sottardyń shyǵarǵan úkimderin Reseı aýmaǵynda moıyndaý jáne oryndaý tártibi 2002 jylǵy 7 qazandaǵy «Azamattyq, otbasylyq jáne qylmystyq ister boıynsha quqyqtyq kómek týraly» konvensıamen retteledi. Osy kelisimge súıene otyryp, Qazaqstan tarapy Reseıge Balýshkın men Saǵymbaev jónindegi sot sheshimin taný jáne oryndaý týraly birneshe ret ótinish joldaǵan. Alaıda Reseıdiń ádilet mınıstrligi bul suraýlardy qanaǵattandyrmaǵan.
Bas prokýratýra muny Reseıdiń atalǵan konvensıany ratıfıkasıalaý kezinde óz azamattaryna qatysty shetel sottary shyǵarǵan úkimderdi taný jáne oryndaýǵa mindetteıtin 109-bapty qoldanbaý týraly arnaıy eskertpe qaldyrýymen túsindirdi.
Sonymen birge vedomstvo Balýshkın men Saǵymbaevtyń izdeýden alynbaǵanyn málimdedi. Sondyqtan olar basqa memlekette tabylyp, ustalǵan jaǵdaıda, olardy ekstradısıalaý baǵytyndaǵy jumystar jalǵasady. Sondaı-aq olardyń Reseı azamattyǵyn qabyldaýyna baılanysty Qazaqstan azamattyǵynan aıyrylǵany habarlandy. Úkimde kórsetilgen múliktik óndirip alýlardy oryndaý máselesi boıynsha Qazaqstannyń ádilet mınıstrligine júginýge keńes berildi.
Eske sala keteıik, 2025 jylǵy sáýirde Qazaqstan soty asa iri kólemdegi alaıaqtyq pen salyq tóleýden jaltarý isi boıynsha Anatolıı Balýshkındi syrttaı 9 jylǵa, al Erik Saǵymbaevty 8 jyl 6 aıǵa bas bostandyǵynan aıyrý týraly úkim shyǵarǵan bolatyn.
