Dúniejúzilik densaýlyq saqtaý uiymy (DDU) Reseiden Sibirde tirkeldi delingen ókpe obasynyń yqtimal ekinshi jaǵdaiyna qatysty qosymsha málimet berýdi surady, dep habarlaidy dalanews.kz.
Resei biligi buqaralyq aqparat quraldarynda taraǵan ókpe obasynyń ekinshi jaǵdaiy týraly habarlamalardy joqqa shyǵardy. Sonymen qatar DDU Máskeýdi bul máselege qatysty resmi túsinikteme berýge shaqyrdy. Kremldiń baspasóz hatshysy Dmitrii Peskov jýrnalisterge bergen málimdemesinde atalǵan jaǵdai jóninde taraǵan aqparattardyń basym bóligi shyndyqqa sáikes kelmeitinin aitty.
Onyń sózinshe, mundai jaǵdailar týraly málimetti Reseidiń sanitarlyq qadaǵalaý qyzmeti – Rospotrebnadzordyń resmi habarlamalarynan alý qajet. Al DDU bas direktory Tedros Adhanom Gebreiesýs Irkýtskidegi ǵylymi institýtta belgisiz sebepten pnevmoniiaǵa shaldyqqan ekinshi qyzmetker týraly aqparatqa túsinik berýdi surady.
«Bul týraly eki buqaralyq aqparat quraly habarlady, olardyń biri – Reseidiń basylymy. Biz Reseiden osy máselege qatysty jaýap berýdi suradyq», – dedi ol sársenbi kúni ótken brifingte.
Tedros uiymǵa kelip túsken mundai habarlamalardy nazardan tys qaldyrýǵa bolmaitynyn atap ótti. Al DDU-nyń epidemiialar men pandemiialar jónindegi direktory Mariia Van Kerkhove alǵashqy boljamdy jaǵdai boiynsha qaitys bolǵan adamnyń naqty qandai qozdyrǵyshtan kóz jumǵany ázirge belgisiz ekenin málimdedi.
Buǵan deiin birqatar halyqaralyq BAQ Sibirdegi ǵylymi mekemede ókpe obasyna uqsas belgileri bar qyzmetkerler anyqtalǵany týraly habarlaǵan bolatyn. Alaida Resei biligi bul aqparattardy rastamady.
