Resei Federatsiiasynda janar-jaǵarmai baǵalarynyń kóterme baǵasy taǵy qymbattaǵany belgili boldy. Bul rettegi qun Qazaqstannan eki esege qymbat, dep habarlaidy Dalanews.kz.
"Sankt-Peterbýrg birjasynda AI-92 benzininiń 1 tonnasynyń birjalyq baǵasy 71 309 rýblge jetti (shamamen 479 myń teńge). Al Qazaqstanda AI-92 benzininiń 1 tonnasynyń birjalyq baǵasy, máselen Pavlodar munai-himiia zaýytynda 249 myń teńge jáne Atyraý munai óńdeý zaýytynda 226 myń teńge bolady. Resei Federatsiiasyndaǵy AI-95 benzininiń 1 tonnasynyń baǵasy 80,3 myń rýblge jetti (shamamen 540 myń teńge). Qazaqstanda bul baǵa 278 myń teńgeni quraidy. Iaǵni, Reseidegi benzinniń kóterme baǵasy Qazaqstanmen salystyrǵanda eki ese joǵary", dep jazady Energy Monitor Telegram arnasy.
Aita ketsek, Energetika ministri 2025 jylǵy 27 qańtarda Qazaqstanda munai ónimderiniń baǵasyn belgileýde osyǵan deiin súienip kelgen ministrliktiń keibir buiryqtarynyń kúshin joidy. Osylaisha 1 aqpannan bastap memlekettik retteý alynyp, janar-jaǵarmai men dizel otynynyń baǵalary erkine jiberildi. Úkimet bul rettegi baǵany jyl sońyna deiin birtindep kóterýdi maqsat etedi. Ondaǵy oi - kórshiles elderdegi baǵany qýyp jetý. Biraq, máselen Reseidegi infliatsiia bizge bul rette shań qaptyrmai tur. 2025 jyly 14 tamyzda elimizdiń soltústik óńirlerinde keibir beketterde benzin tek talonmen bosatylyp, Energetika ministrligi málimdeme jasaýǵa májbúr bolǵan. Sondai-aq osy kezeńde Qazaqstanda rýbl qymbattap, reseilikter shekaralas óńirlerge kólikterimen lap qoiǵanyn da jazǵanbyz.
