Qazaqstan syrtqy ister ministrligi eldiń burynǵy prezidenti Nursultan Nazarbaevtyń jaqynda Máskeýde Resei prezidenti Vladimir Pýtinmen kezdeskende qandai máseleni talqylaǵanyn bilmeidi.
14 maýsymda úkimet otyrysynan shyqqan soń jýrnalisterdiń qoiǵan saýalyna syrtqy ister ministri Muhtar Tileýberdi osylai dep jaýap berdi.
"Ol (Nazarbaev) bedeldi saiasatker, halyqaralyq qaýymdastyqqa belgili, prezident Pýtinmen jeke dostyq qarym-qatynasy bar, nege aralasýǵa bolmaidy?" dedi ministr.
Jýrnalister ministrge eks-prezident sapary týraly ministrlikke eskertti me dep suraq qoidy.
«Meniń oiymsha, Syrtqy ister ministrligine eskertý qajet emes. Bul tuńǵysh prezidenttiń Is basqarmasy men Resei Prezidentiniń Ákimshiligi arasynda tikelei kelisilgen. Resei prezidentimen kezdesýge tyiym salynbaǵan shyǵar. Olardy ejelden kele jatqan dostyq, jeke dostyq bailanystyrady», – dep jaýap berdi Tileýberdi.
Tileýberdi Nazarbaevtyń Máskeýge saparynyń maqsaty jaily birinshi prezidenttiń keńsesinen suraýǵa keńes berdi.
Nazarbaev ótken aptada Máskeýde Resei prezidenti Vladimir Pýtinmen kezdesip, "Resei kúnimen" quttyqtaǵany týraly qysqa aqparatty keiin eks-prezidenttiń resmi saity jariialaǵan.
"Nursultan Nazarbaev pen Vladimir Pýtin bir-birine myqty densaýlyq jáne amandyq tilep, aradaǵy dostyq bailanys aldaǵy ýaqytta da Qazaqstan men Resei halyqtarynyń igiligi úshin jalǵasyn tabady degen senim bildirdi" dep habarlady Nazarbaevtyń baspasóz qyzmeti.
12 maýsym – Reseidiń memlekettik egemendigi týraly deklaratsiiasy kúni nemese Resei kúni.
Aqorda saitynda Qazaqstannyń Kreml basshylyǵyn "Resei kúnimen" quttyqtaǵany týraly aqparat joq.
Bul joly Nazarbaev Máskeýge óziniń "tuńǵysh prezident – Elbasy" degen erekshe mártebesi jónindegi baptardy Qazaqstan Konstitýtsiiasynan alyp tastaýdy maquldaǵan jalpyulttyq referendýmnan keiin bardy.
Munyń aldynda ol Reseige byltyr jeltoqsannyń aiaǵyna qarai baryp, Sankt-Peterbýrgte ótken TMD elderi basshylarynyń beiresmi sammitine qatysqan edi.
Qańtar oqiǵasynan soń Nazarbaev óziniń zeinetker ekenin málimdep, kópshilik aldyna shyǵýdy siretken.
5 maýsymdaǵy referendýmnan keiin parlament senatynyń tóraǵasy Máýlen Áshimbaev qazir el basshylyǵy memlekettik máselelerdi eks-prezidentpen "aqyldaspaidy" dep málimdegen.
Dúisenbide Aqorda eldiń qazirgi prezidenti Qasym-Jomart Toqaev Pýtinniń shaqyrýy boiynsha 17 maýsymda Sankt-Peterbýrgte ótetin halyqaralyq ekonomikalyq forýmǵa baratynyn habarlady.
Derekkóz: Azattyq
