قازاقستان سىرتقى ىستەر مينيسترلىگى ەلدىڭ بۇرىنعى پرەزيدەنتى نۇرسۇلتان نازاربايەۆتىڭ جاقىندا ماسكەۋدە رەسەي پرەزيدەنتى ۆلاديمير پۋتينمەن كەزدەسكەندە قانداي ماسەلەنى تالقىلاعانىن بىلمەيدى.
14 ماۋسىمدا ۇكىمەت وتىرىسىنان شىققان سوڭ جۋرناليستەردىڭ قويعان ساۋالىنا سىرتقى ىستەر ءمينيسترى مۇحتار تىلەۋبەردى وسىلاي دەپ جاۋاپ بەردى.
"ول (نازاربايەۆ) بەدەلدى ساياساتكەر، حالىقارالىق قاۋىمداستىققا بەلگىلى، پرەزيدەنت پۋتينمەن جەكە دوستىق قارىم-قاتىناسى بار، نەگە ارالاسۋعا بولمايدى؟" دەدى مينيستر.
جۋرناليستەر مينيسترگە ەكس-پرەزيدەنت ساپارى تۋرالى مينيسترلىككە ەسكەرتتى مە دەپ سۇراق قويدى.
«مەنىڭ ويىمشا، سىرتقى ىستەر مينيسترلىگىنە ەسكەرتۋ قاجەت ەمەس. بۇل تۇڭعىش پرەزيدەنتتىڭ ءىس باسقارماسى مەن رەسەي پرەزيدەنتىنىڭ اكىمشىلىگى اراسىندا تىكەلەي كەلىسىلگەن. رەسەي پرەزيدەنتىمەن كەزدەسۋگە تىيىم سالىنباعان شىعار. ولاردى ەجەلدەن كەلە جاتقان دوستىق، جەكە دوستىق بايلانىستىرادى»، – دەپ جاۋاپ بەردى تىلەۋبەردى.
تىلەۋبەردى نازاربايەۆتىڭ ماسكەۋگە ساپارىنىڭ ماقساتى جايلى ءبىرىنشى پرەزيدەنتتىڭ كەڭسەسىنەن سۇراۋعا كەڭەس بەردى.
نازاربايەۆ وتكەن اپتادا ماسكەۋدە رەسەي پرەزيدەنتى ۆلاديمير پۋتينمەن كەزدەسىپ، "رەسەي كۇنىمەن" قۇتتىقتاعانى تۋرالى قىسقا اقپاراتتى كەيىن ەكس-پرەزيدەنتتىڭ رەسمي سايتى جاريالاعان.
"نۇرسۇلتان نازاربايەۆ پەن ۆلاديمير پۋتين بىر-بىرىنە مىقتى دەنساۋلىق جانە اماندىق تىلەپ، اراداعى دوستىق بايلانىس الداعى ۋاقىتتا دا قازاقستان مەن رەسەي حالىقتارىنىڭ يگىلىگى ءۇشىن جالعاسىن تابادى دەگەن سەنىم ءبىلدىردى" دەپ حابارلادى نازاربايەۆتىڭ باسپا ءسوز قىزمەتى.
12 ماۋسىم – رەسەيدىڭ مەملەكەتتىك ەگەمەندىگى تۋرالى دەكلاراسياسى كۇنى نەمەسە رەسەي كۇنى.
اقوردا سايتىندا قازاقستاننىڭ كرەمل باسشىلىعىن "رەسەي كۇنىمەن" قۇتتىقتاعانى تۋرالى اقپارات جوق.
بۇل جولى نازاربايەۆ ماسكەۋگە ءوزىنىڭ "تۇڭعىش پرەزيدەنت – ەلباسى" دەگەن ەرەكشە مارتەبەسى جونىندەگى باپتاردى قازاقستان كونستيتۋسياسىنان الىپ تاستاۋدى ماقۇلداعان جالپىۇلتتىق رەفەرەندۋمنان كەيىن باردى.
مۇنىڭ الدىندا ول رەسەيگە بىلتىر جەلتوقساننىڭ اياعىنا قاراي بارىپ، سانكت-پەتەربۋرگتە وتكەن تمد ەلدەرى باسشىلارىنىڭ بەيرەسمي سامميتىنە قاتىسقان ەدى.
قاڭتار وقيعاسىنان سوڭ نازاربايەۆ ءوزىنىڭ زەينەتكەر ەكەنىن مالىمدەپ، كوپشىلىك الدىنا شىعۋدى سيرەتكەن.
5 ماۋسىمداعى رەفەرەندۋمنان كەيىن پارلامەنت سەناتىنىڭ ءتوراعاسى ماۋلەن اشىمبايەۆ ءقازىر ەل باسشىلىعى مەملەكەتتىك ماسەلەلەردى ەكس-پرەزيدەنتپەن "اقىلداسپايدى" دەپ مالىمدەگەن.
دۇيسەنبىدە اقوردا ەلدىڭ قازىرگى پرەزيدەنتى قاسىم-جومارت توقايەۆ ءپۋتيننىڭ شاقىرۋى بويىنشا 17 ماۋسىمدا سانكت-پەتەربۋرگتە وتەتىن حالىقارالىق ەكونوميكالىق فورۋمعا باراتىنىن حابارلادى.
دەرەككوز: ازاتتىق
