Raiymbek aýdanynda qurylys qarqyndy júrýde
Búginde Raiymbek aýdanynda jol jóndelip, jańa áleýmettik nysandardyń qurylysy júrip jatyr. Bul baǵytta jumystar aldaǵy ýaqytta jastardy aýyl-aimaqta turaqtandyrýǵa septigin tigizetini sózsiz. Eń bastysy, kezinde kartobymen Qazaqstanǵa tanylǵan Raiymbek aýdany búginde dástúrli kásibin jolǵa qoiyp, Almaty oblysyn kartoppen qamtýǵa beldi bekem býǵanyn airyqsha atap aitýǵa bolady. Budan bólek, aýdanda mal sharýashylyǵy men óndiris te oń baǵytta damyp keledi.
Almaty oblysy ákiminiń birinshi orynbasary Lázzat Turlashov aýdan ortalyǵy Narynqolda taýdyń eteginde salyp jatqan sporttyq-saýyqtyrý kesheniniń jumysymen tanysty. Búginde qurylysshylar keshen salynatyn 4069,7 sharshy metr jerdi tereńdete qazyp, irgetasyn quiý úshin daiyndyq jumystaryn júrgizip jatqanyn kórdi.
Kezdesý barysynda oblys ákiminiń orynbasary nysan qurylysyna jaýapty «Fýd MS» seriktestiginiń direktory Seiitjan Qusaiynovpen tildesip, jumys barysymen tanysty.
Budan keiin aýdan ortalyǵyndaǵy burynǵy Narynqol aýyldyq ákimshiligi ornalasqan ǵimaratqa júrgizilip jatqan kúrdeli jóndeý jumystaryn baqylady. Quny 176 million teńge turatyn qurylys jumysyn memlekettik-jekemenshik áriptestik negizinde «Fýd MS» seriktestigi júrgizip jatyr. Kúrdeli jóndeý jumystary kelesi aidyń sońynda bitedi dep josparlanǵan. Eki qabatty eńseli ǵimaratqa aldaǵy ýaqytta Raiymbek aýdanynyń kirister, statistika jáne qazynashylyq bólimderi qonystanady dep kútilýde. Al ǵimarattyń artqy jaǵyndaǵy aýmaqqa Halyqqa qyzmet kórsetý ortalyǵy men aýdandyq arhiv salynbaq.
Oblys ákiminiń orynbasary L.Turlashov budan soń buryn aýdandyq prokýratýranyń mekenjaiy bolǵan ǵimaratqa júrgizilip jatqan kúrdeli jóndeý jumystaryn kórdi. Atalǵan ǵimarattyń janyna qosymsha taǵy bir nysannyń irgetasyn qalaý jumysy júrgizilýde.
Qarqyndy qurylys aýdan ákimdigi ornalasqan úsh qabatty ǵimaratta da júrip jatyr. Ótken jyly qolǵa alynǵan isti mamyr aiynyń aiaǵyna deiin aiaqtaý josparlanǵan. Ǵimarattyń shatyry aýystyrylyp, eski sylaqtary túsirilip, seismikalyq kúsheitý jumystary tolyǵymen júrgizilgen. Jańadan esik-terezeler ornatylǵan. Dál qazirgi ýaqytta ishki sylaq jumystary júrip jatyr. Quny 496 million teńge turatyn kúrdeli jóndeý jumysy Sábit Qalimoldaev basqaratyn «Gýni Stroi Servis» JShS-na júktelgen.
Nysandardy aralap shyqqan soń oblys ákiminiń orynbasary aýdandyq ákimshiliktiń májilis zalynda shaǵyn jiyn ótkizip, óńirdegi qurylys jumystaryn jan-jaqty sóz etti. Óz kezeginde aýdan ákimi Jolan Omarov:
– Biyl Raiymbek aýdanynda halyqqa qyzmet kórsetý ortalyǵy, muraǵat, azamattarǵa arnalǵan úkimet ǵimaraty, prokýratýra, órt sóndirý mekemesi, Narynqol aýyldyq ákimshilik ǵimarattary men 83 páterli kommýnaldyq turǵyn úidiń qurylysy qolǵa alynady. Ulttyq qaýipsizdik komiteti filialynyń ǵimaratyna kúrdeli jóndeý jumysy júrgiziledi. Munyń syrtynda 8 qyzmettik turǵyn úi salý josparda tur. Aýdan aýmaǵyndaǵy Tekes, Sarybastaý, Shalkóde, Jambyl aýyldyq ákimdikteriniń jańa ǵimaraty boi kóteredi. Jambyl, Súmbe aýylynda jańadan Mádeniet úii turǵyzylady. Qaqpaq, Jambyl aýylynda dárigerlik ambýlatoriianyń qurylysy qolǵa alynady. Aýdan ortalyǵynan kún saiyn 250 adam qabyldaityn emhana salynyp, jalpy kólemi 54 shaqyrym bolatyn kóshe joldarynyń 29,5 shaqyrymy asfalttalady. Munyń bári qaita qalpyna kelgen aýdan úshin úlken jaqsylyq, – dep aldaǵy josparmen bólisti.
Atqarylǵan iske rizashylyǵyn bildirgen oblys ákiminiń orynbasary L.Turlashov aýdan jáne merdiger kompaniia basshylaryna atalǵan qurylys nysandaryn belgilengen merzimde sapaly bitirip, ýaqytynda paidalanýǵa berý jóninde tapsyrma berdi.
«QmD» aqparat
