بۇگىندە رايىمبەك اۋدانىندا جول جوندەلىپ، جاڭا الەۋمەتتىك نىسانداردىڭ قۇرىلىسى ءجۇرىپ جاتىر. بۇل باعىتتا جۇمىستار الداعى ۋاقىتتا جاستاردى اۋىل-ايماقتا تۇراقتاندىرۋعا سەپتىگىن تيگىزەتىنى ءسوزسىز. ەڭ باستىسى، كەزىندە كارتوبىمەن قازاقستانعا تانىلعان رايىمبەك اۋدانى بۇگىندە ءداستۇرلى كاسىبىن جولعا قويىپ، الماتى وبلىسىن كارتوپپەن قامتۋعا بەلدى بەكەم بۋعانىن ايرىقشا اتاپ ايتۋعا بولادى. بۇدان بولەك، اۋداندا مال شارۋاشىلىعى مەن ءوندىرىس تە وڭ باعىتتا دامىپ كەلەدى.
الماتى وبلىسى اكىمىنىڭ ءبىرىنشى ورىنباسارى ءلاززات تۇرلاشوۆ اۋدان ورتالىعى نارىنقولدا تاۋدىڭ ەتەگىندە سالىپ جاتقان سپورتتىق-ساۋىقتىرۋ كەشەنىنىڭ جۇمىسىمەن تانىستى. بۇگىندە قۇرىلىسشىلار كەشەن سالىناتىن 4069،7 شارشى مەتر جەردى تەرەڭدەتە قازىپ، ىرگەتاسىن قۇيۋ ءۇشىن دايىندىق جۇمىستارىن جۇرگىزىپ جاتقانىن كوردى.
كەزدەسۋ بارىسىندا وبلىس اكىمىنىڭ ورىنباسارى نىسان قۇرىلىسىنا جاۋاپتى «فۋد مس» سەرىكتەستىگىنىڭ ديرەكتورى سەيىتجان قۇسايىنوۆپەن تىلدەسىپ، جۇمىس بارىسىمەن تانىستى.
بۇدان كەيىن اۋدان ورتالىعىنداعى بۇرىنعى نارىنقول اۋىلدىق اكىمشىلىگى ورنالاسقان عيماراتقا جۇرگىزىلىپ جاتقان كۇردەلى جوندەۋ جۇمىستارىن باقىلادى. قۇنى 176 ميلليون تەڭگە تۇراتىن قۇرىلىس جۇمىسىن مەملەكەتتىك-جەكەمەنشىك ارىپتەستىك نەگىزىندە «فۋد مس» سەرىكتەستىگى جۇرگىزىپ جاتىر. كۇردەلى جوندەۋ جۇمىستارى كەلەسى ايدىڭ سوڭىندا بىتەدى دەپ جوسپارلانعان. ەكى قاباتتى ەڭسەلى عيماراتقا الداعى ۋاقىتتا رايىمبەك اۋدانىنىڭ كىرىستەر، ستاتيستيكا جانە قازىناشىلىق بولىمدەرى قونىستانادى دەپ كۇتىلۋدە. ال عيماراتتىڭ ارتقى جاعىنداعى اۋماققا حالىققا قىزمەت كورسەتۋ ورتالىعى مەن اۋداندىق ارحيۆ سالىنباق.
وبلىس اكىمىنىڭ ورىنباسارى ل.تۇرلاشوۆ بۇدان سوڭ بۇرىن اۋداندىق پروكۋراتۋرانىڭ مەكەنجايى بولعان عيماراتقا جۇرگىزىلىپ جاتقان كۇردەلى جوندەۋ جۇمىستارىن كوردى. اتالعان عيماراتتىڭ جانىنا قوسىمشا تاعى ءبىر نىساننىڭ ىرگەتاسىن قالاۋ جۇمىسى جۇرگىزىلۋدە.
قارقىندى قۇرىلىس اۋدان اكىمدىگى ورنالاسقان ءۇش قاباتتى عيماراتتا دا ءجۇرىپ جاتىر. وتكەن جىلى قولعا الىنعان ءىستى مامىر ايىنىڭ اياعىنا دەيىن اياقتاۋ جوسپارلانعان. عيماراتتىڭ شاتىرى اۋىستىرىلىپ، ەسكى سىلاقتارى ءتۇسىرىلىپ، سەيسميكالىق كۇشەيتۋ جۇمىستارى تولىعىمەن جۇرگىزىلگەن. جاڭادان ەسىك-تەرەزەلەر ورناتىلعان. ءدال قازىرگى ۋاقىتتا ىشكى سىلاق جۇمىستارى ءجۇرىپ جاتىر. قۇنى 496 ميلليون تەڭگە تۇراتىن كۇردەلى جوندەۋ جۇمىسى ءسابيت قاليمولدايەۆ باسقاراتىن «گۋني ستروي سەرۆيس» جشس-نا جۇكتەلگەن.
نىسانداردى ارالاپ شىققان سوڭ وبلىس اكىمىنىڭ ورىنباسارى اۋداندىق اكىمشىلىكتىڭ ءماجىلىس زالىندا شاعىن جيىن وتكىزىپ، وڭىردەگى قۇرىلىس جۇمىستارىن جان-جاقتى ءسوز ەتتى. ءوز كەزەگىندە اۋدان اكىمى جولان وماروۆ:
– بيىل رايىمبەك اۋدانىندا حالىققا قىزمەت كورسەتۋ ورتالىعى، مۇراعات، ازاماتتارعا ارنالعان ۇكىمەت عيماراتى، پروكۋراتۋرا، ءورت ءسوندىرۋ مەكەمەسى، نارىنقول اۋىلدىق اكىمشىلىك عيماراتتارى مەن 83 پاتەرلى كوممۋنالدىق تۇرعىن ءۇيدىڭ قۇرىلىسى قولعا الىنادى. ۇلتتىق قاۋىپسىزدىك كوميتەتى فيليالىنىڭ عيماراتىنا كۇردەلى جوندەۋ جۇمىسى جۇرگىزىلەدى. مۇنىڭ سىرتىندا 8 قىزمەتتىك تۇرعىن ءۇي سالۋ جوسپاردا تۇر. اۋدان اۋماعىنداعى تەكەس، سارىباستاۋ، شالكودە، جامبىل اۋىلدىق اكىمدىكتەرىنىڭ جاڭا عيماراتى بوي كوتەرەدى. جامبىل، سۇمبە اۋىلىندا جاڭادان مادەنيەت ءۇيى تۇرعىزىلادى. قاقپاق، جامبىل اۋىلىندا دارىگەرلىك امبۋلاتوريانىڭ قۇرىلىسى قولعا الىنادى. اۋدان ورتالىعىنان كۇن سايىن 250 ادام قابىلدايتىن ەمحانا سالىنىپ، جالپى كولەمى 54 شاقىرىم بولاتىن كوشە جولدارىنىڭ 29،5 شاقىرىمى اسفالتتالادى. مۇنىڭ ءبارى قايتا قالپىنا كەلگەن اۋدان ءۇشىن ۇلكەن جاقسىلىق، – دەپ الداعى جوسپارمەن ءبولىستى.
اتقارىلعان ىسكە ريزاشىلىعىن بىلدىرگەن وبلىس اكىمىنىڭ ورىنباسارى ل.تۇرلاشوۆ اۋدان جانە مەردىگەر كومپانيا باسشىلارىنا اتالعان قۇرىلىس نىساندارىن بەلگىلەنگەن مەرزىمدە ساپالى ءبىتىرىپ، ۋاقىتىندا پايدالانۋعا بەرۋ جونىندە تاپسىرما بەردى.
«قمد» اقپارات
