RAMS Global qojaiyny, Túrkiianyń beldi kásipkeri Ramazan Bulbuldyń úsh uly Qazaqstandaǵy RAMS kompaniiasyn birlese basqaryp kelgen bolatyn. Sońǵy sóz ózinde bolýy tiis úlken ul - Doǵan Bulbul sońǵy ýaqytta kompaniianyń operatsiialyq jumystaryn baýyry Farýkke senip tapsyrǵan.
«Farýk shyny kerek, RAMS jumysyn durys júrgize almaǵan siiaqty. Birneshe jobalarynan shikilik shyqqandai. Túrkiiadan investorlar pýlyn tartaiyn dep otyrǵan, ózderi úmit artqan Almatydaǵy RAMS Beyond jobasy tyǵyryqqa tireldi. Bulbuldar jobaǵa qarsy shyqqan Májilis depýtattarymen kelise almady, jurtshylyqpen múlde jumys istemedi. Prezidenttiń jónsiz qurylys boiynsha eskertýin umytpaǵan Almaty ákimi Darhan Satybaldy RAMS-tan etegin aýlaq saldy», - deidi, DALA INSIDE derekkózi.
Bul jaǵdai Doǵan Bulbuldyń ashýyn týǵyzdy degen aqparat bar. Ol Farýktiń qolynan barlyq basqarýshy fýnktsiiany alyp alyp, RAMS degen ataýdy túgel óshirip, múlde jańa kompaniia jasaýǵa kirisken. Bul otbasylyq kikiljiń jaqsy qaralym jinap júrgen túrik serialdarynyń siýjetine qatty uqsaidy. Derekkóz sózinshe, sońǵy eki aptada kompaniiada úlken qysqartýlar júrgen. Endi kompaniiaǵa qazaqi bolmystaǵy ataý qoiý josparlanyp otyr. RAMS degen ataý Qazaqstanda múlde bolmaidy. Úlken ul "Turan" degen ataýǵa jaqyn. Biraq basqa da nusqalardy joqqa shyǵarmaidy.
Derekkóz sózinshe Farýk ádemi ómir súrýdi ańsap, ózin oligarh biznesmen rólinde kórip, aqshany ońdy-sońdy shasha bastaǵan. Onysy RAMS úshin qiyndyqtar týǵyzdy. Ratsionaldy jáne sharýaqor Doǵan endi osy olqylyqtardy óz qolymen rettep, kompaniia qarjysy men ishki jumysyn retke keltirmek.
Al keshe Almaty prokýratýrasy RAMS kompaniiasy turǵyzyp jatqan turǵyn úi keshenderine qatysty úleskerlerdiń aldanyp qalmaýy úshin barlyq aldyn-alý sharalaryn bastap ketti. Qarjylyq monitoring agenttigi de RAMS tranzaktsiialaryn baqylap otyr. Basty maqsat – kapitaldyń shetelge shyǵyp ketpeýin qamtamasyz etý. Ulttyq qaýipsizdik qyzmetiniń shekara qyzmeti de tiisti nusqaýlar alǵan.
RAMS problemalary 2020 jyly NEF UPTOWN turǵyn úi kesheninen bastaldy. 2021 jyly joba boiynsha seriktester - NEF Qazaqstan men RAMS arasynda kikiljiń oryn alǵany jasyryn emes. Artynan NEF jobalaryn jalǵastyrý úshin Astana qarjy ortalyǵynyń birjasynan obligatsiialar ornalastyryp, investorlar qarjysyn tarta bastady da, ol mindettemelerin oryndai almai, defoltqa ushyrady. Al cheloveinik atanǵan RAMS City turǵyn úi kesheni men jumysy turalaǵan, záýlim qonaqúi kesheni bolýy tiis Beyond jobasy shyny kerek kompaniianyń halyq aldyndaǵy bedelin múlde túsirip jiberdi. Jedel rebrendingtiń bir syry da osynda jatyr.
