Mańǵystaýda «Taza Qazaqstan» aýqymdy senbilik ótti. Jaǵalaýdy, saiabaqtardy, alańdardy, tipti teńiz túbin tazalaýǵa 3 myńnan astam adam shyǵyp, 100-ge jýyq arnaiy tehnika jumyldyryldy. Barlyǵy 300 tonna qoqys jinalyp, shyǵaryldy.
Aptap ystyqqa bailanysty senbilik tańerteń erte bastaldy. Memlekettik qyzmetkerler, kásipkerler men politsiia qyzmetkerleri, ártister men qoǵam belsendileri, depýtattar men sportshylar, paralimpiadashylar, energetikter men dárigerler, súńgýirler men bank qyzmetkerleri, kóp balaly analar men oblys turǵyndary qoqystardy shyǵaryp, qamystardy jinap, jaǵalaýdy tazartty.
Sondai-aq, Aqtaý jáne Jańaózen qalalary men Munaily, Mańǵystaý, Túpqaraǵan, Beineý jáne Qaraqiia da senbilikke atsalysty.
Aqtaýdaǵy ekologiialyq shara erekshe formatta uiymdastyryldy. Teńiz jaǵasyna kiiz úiler tigilip, aktsiiaǵa qatysýshylarǵa ystyq tamaq pen shai usynyldy. Turǵyndar úshin aýyl sharýashylyǵy ónimderiniń jármeńkesi uiymdastyryldy.
Áýensiz tazalyq qalai júrgizilmek? Aqtaýlyq akter, ánshi, jyrshy Nursultan Jeksenbaev senbilikke qatysýshylarǵa arnaý arnady. Oryndaýshynyń aitýynsha, tórt shýmaqtan turatyn bul shyǵarmada Kaspii teńiziniń jaǵasynda ornalasqan Aqtaýdyń ulylyǵy, kóriktiligi men tazalyǵy dáripteledi.
– Jan dúniesi taza adam óz qalasyna nemquraily qarai almaidy. Bul bárimiz úshin mańyzdy. Azamattyq pozitsiiamdy kórsetip, senbilikke qatysýshylardy jigerlendirý úshin arnaý aittym. Osylaisha ortaq iske óz úlesimdi qosqym keledi», – dedi Nursultan Jeksenbaev.
Jaǵada súńgýirler sý túbin tazartýǵa arnaiy kiimderin kiip, teńiz túbinde jinalǵan qoqystardy tazartty. Onyń ishinde, plastik, sómkeler jáne metall bankalar kóptep kezdesedi. Komandir leitenant, súńgýir qyzmetiniń aǵa nusqaýshysy Sairan Ábdikárimov Qazaqstan Respýblikasy Áskeri-teńiz kúshterinde 9 jyldan astam qyzmet etip keledi. Ol áskerilerdiń mundai igi isterdi árqashan qoldaýǵa daiyn ekenin atap ótti.
«Úsh súńgýir shamamen 250 sharshy metr aýmaqty bólip alyp, árqaisysy qoqys jinady. Ótken joly 10 qap jinadyq, bul joly - 12 qap. Mundai is-sharalarǵa árqashan qýana qatysamyn, óitkeni teńizimiz taza bolýy kerek», - deidi súńgýir.
Qyzmettik qarýdyń ornyna – kúrek pen tyrma. Politsiia qyzmetkerleri de búgin jaǵalaýda jumysqa kiristi. Sonyń biri - politsiia inspektory, politsiia maiory, SOBR qyzmetkeri Ǵabit Halbaev. Ol jumys kóp ýaqytyn alatynyn, alaida sonyń arasynda ýaqyt taýyp, otbasymen birge teńizge kelip úlgeretinin aitty.
«Jaǵajai men qoqysty kórgende, bizdiń azamattardyń tabiǵatqa osylai qaraityny qatty qynjyltady. Qoqysty árdaiym jinap júremiz jáne balalarǵa da únemi qoqys tastamaý kerektigin túsindiremin, al qoqysty tastaǵandarǵa eskertý beremin. Aita keteiin, apta saiyn bólim ǵimaratynyń aýmaǵynda senbilik ótkizemiz, búgin mundai aýqymdy sharaǵa birinshi ret qatysyp otyrmyn», - deidi maior.
Qala turǵyndarymen birge jaǵalaýdy tazalaýǵa N. Jantýrin mýzykalyq-drama teatrynyń sharýashylyq meńgerýshisi Gúlsara Súndetova senbilikke óz súiikti qalasy úshin kelgenin jáne ony qala qonaqtaryna maqtanyshpen kórsetkisi keletinin aitady.
«Biz jerimizdiń taza bolǵanyn jáne jaǵalaýdyń ádemi bolǵanyn qalaimyz. Óitkeni, adamdar poligonǵa emes, demalysqa keletindei tazalyq kerek. Baratyn týystarymyzǵa taza teńiz ben jaǵalaýdy kórsetkim keledi, óitkeni teńiz - basty kórikti jerimiz. Men adamdardy ózinen qalǵan qoqystardy jinap ketýge shaqyramyn, ózińizben birge jeńil paket ala júrý qiyn emes. Sondai-aq, qalamyzdy kúnde taza ustaityn sypyrýshylarymyzǵa alǵys aitamyn!».
Jaǵalaýdy retke keltirip, isker áriptesterimen kezdesken mekeme qyzmetkerleri senbilik kúnin timbilding is-sharasyna ainaldyrýdy uiǵardy.
«Bizdiń mekeme qoǵamdyq tamaqtandyrý salasynda jumys isteidi. Búgingi tańda 50 qyzmetker osy aýmaqty taza jerge ainaldyrý úshin ádemi teńizimizdiń jaǵasyna jinaldy. Tazalyq ózimizden, otbasymyzdan bastalady. Sondyqtan biz osyndai sharalardy árqashan qýana qoldaimyz. Mundai igi is ujymnyń uiymshyldyǵyn arttyrady. Odan bólek, tazalyq jumystaryn júrgizip jatqanda basqa kásiporyndaǵy áriptestermen kezdesip, áńgimelestik», – deidi «Bereket-F» JShS bas direktorynyń orynbasary Anar Kýlchikova.
Aqtaýlyq jastar senbilikke shyǵarmashylyq shabytpen keldi. 70-ke jýyq jastar jaǵalaýdy tazartyp, án shyrqap, senbilikke qatysýshylarǵa keremet kóńil-kúi syilady.
«Qalamyzdyń eń kórikti jerleriniń biri – jaǵalaý. Biraq, kóp adamdar ony lastap tastaidy, ásirese túnnen keiin kóp qoqys qalady. Biz árqashan tazalyqqa umtylýymyz kerek. Bizdiń mindetimiz – qoǵamǵa paida tigizý», – deidi oblystyq jastar saiasaty máseleleri basqarmasynyń bólim basshysy Abylai Fazylbek.
Sonymen qatar, «Taza Qazaqstan» sharasyna 150-ge jýyq sportshy, onyń ishinde Mańǵystaý oblystyq múgedekter sport klýbynyń 15 múshesi qatysty. Olardyń qatarynda parapaýerliftingten halyqaralyq dárejedegi sport sheberi Ǵani Esentemirov, bokstan álem chempiony Bekzat Nurdáýletov, bokstan Aziia chempiony Berik Ábdirahmanov, bokstan álem chempionatynyń kúmis júldegeri Ádilbek Niiazymbetov bar.
«Búgin sportshylar shette qalmai, súiikti qalamyzdyń kelbetin jaqsartýǵa jan-jaqty kómek kórsetýdi uiǵardy. Óitkeni, týǵan jerdi kórkeitý – árbir azamattyń boryshy. Qoqys pen shópti jinap, úsh júk kóligine tiedik», – dedi Ǵani Esentemirov.
Senbilikke ózgelermen birge Mańǵystaý oblysynyń ákimi Nurdáýlet Qilybai da shyqty. Óńir basshysy jaǵalaýdy tazalap bolǵan soń, kúndelikti qala tazalyǵyn kúzetetin kommýnaldyq qyzmetshilermen áńgimelesip, shai ishti.
«Qala turǵyndarynyń belsendiligin erekshe atap ótý kerek. Mańǵystaý – ortaq úiimiz. Barlyǵymyz taza kóshemen júrip, taza jerde serýendegimiz keledi. Al ol tek ózimizge bainalysty. Bul ekologiialyq mádenietti qalyptastyrýǵa baǵyttalǵan úlken shara. Qorshaǵan ortany uqypty ustaý, ólkemizdi qoqysqa toltyrmaý árqaisysymyzdyń mindetimiz. Mundai sharalar dástúrli túrde jalǵasyn tabýy kerek», – deidi Nurdáýlet Igilikuly.
Jalpy respýblikalyq "Taza Qazaqstan" eko-naýqany aiasynda ótken Aqtaýdaǵy aýqymdy senbilik jaǵalaýdaǵy jármeńkemen jáne kontserttik baǵdarlamamen jalǵasty. Jaǵalaýda kiiz úi tigilip, eko-sharanyń barlyq qatysýshylaryna ystyq shai men as berildi.
