ماڭعىستاۋدا «تازا قازاقستان» اۋقىمدى سەنبىلىك ءوتتى. جاعالاۋدى، ساياباقتاردى، الاڭداردى، ءتىپتى تەڭىز ءتۇبىن تازالاۋعا 3 مىڭنان استام ادام شىعىپ، 100-گە جۋىق ارنايى تەحنيكا جۇمىلدىرىلدى. بارلىعى 300 توننا قوقىس جينالىپ، شىعارىلدى.
اپتاپ ىستىققا بايلانىستى سەنبىلىك تاڭەرتەڭ ەرتە باستالدى. مەملەكەتتىك قىزمەتكەرلەر، كاسىپكەرلەر مەن پوليسيا قىزمەتكەرلەرى، ارتىستەر مەن قوعام بەلسەندىلەرى، دەپۋتاتتار مەن سپورتشىلار، پاراليمپياداشىلار، ەنەرگەتيكتەر مەن دارىگەرلەر، سۇڭگۋىرلەر مەن بانك قىزمەتكەرلەرى، كوپ بالالى انالار مەن وبلىس تۇرعىندارى قوقىستاردى شىعارىپ، قامىستاردى جيناپ، جاعالاۋدى تازارتتى.
سونداي-اق، اقتاۋ جانە جاڭاوزەن قالالارى مەن مۇنايلى، ماڭعىستاۋ، ءتۇپقاراعان، بەينەۋ جانە قاراقيا دا سەنبىلىككە اتسالىستى.
اقتاۋداعى ەكولوگيالىق شارا ەرەكشە فورماتتا ۇيىمداستىرىلدى. تەڭىز جاعاسىنا كيىز ۇيلەر تىگىلىپ، اكسياعا قاتىسۋشىلارعا ىستىق تاماق پەن شاي ۇسىنىلدى. تۇرعىندار ءۇشىن اۋىل شارۋاشىلىعى ونىمدەرىنىڭ جارمەڭكەسى ۇيىمداستىرىلدى.
اۋەنسىز تازالىق قالاي جۇرگىزىلمەك؟ اقتاۋلىق اكتەر، ءانشى، جىرشى نۇرسۇلتان جەكسەنبايەۆ سەنبىلىككە قاتىسۋشىلارعا ارناۋ ارنادى. ورىنداۋشىنىڭ ايتۋىنشا، ءتورت شۋماقتان تۇراتىن بۇل شىعارمادا كاسپيي تەڭىزىنىڭ جاعاسىندا ورنالاسقان اقتاۋدىڭ ۇلىلىعى، كورىكتىلىگى مەن تازالىعى دارىپتەلەدى.
– جان دۇنيەسى تازا ادام ءوز قالاسىنا نەمقۇرايلى قاراي المايدى. بۇل ءبارىمىز ءۇشىن ماڭىزدى. ازاماتتىق پوزيسيامدى كورسەتىپ، سەنبىلىككە قاتىسۋشىلاردى جىگەرلەندىرۋ ءۇشىن ارناۋ ايتتىم. وسىلايشا ورتاق ىسكە ءوز ۇلەسىمدى قوسقىم كەلەدى»، – دەدى نۇرسۇلتان جەكسەنبايەۆ.
جاعادا سۇڭگۋىرلەر سۋ ءتۇبىن تازارتۋعا ارنايى كيىمدەرىن كيىپ، تەڭىز تۇبىندە جينالعان قوقىستاردى تازارتتى. ونىڭ ىشىندە، پلاستيك، سومكەلەر جانە مەتالل بانكالار كوپتەپ كەزدەسەدى. كوماندير لەيتەنانت، سۇڭگۋىر قىزمەتىنىڭ اعا نۇسقاۋشىسى سايران ابدىكارىموۆ قازاقستان رەسپۋبليكاسى اسكەري-تەڭىز كۇشتەرىندە 9 جىلدان استام قىزمەت ەتىپ كەلەدى. ول اسكەريلەردىڭ مۇنداي يگى ىستەردى ءارقاشان قولداۋعا دايىن ەكەنىن اتاپ ءوتتى.
«ءۇش سۇڭگۋىر شامامەن 250 شارشى مەتر اۋماقتى ءبولىپ الىپ، ءارقايسىسى قوقىس جينادى. وتكەن جولى 10 قاپ جينادىق، بۇل جولى - 12 قاپ. مۇنداي ءىس-شارالارعا ءارقاشان قۋانا قاتىسامىن، ويتكەنى تەڭىزىمىز تازا بولۋى كەرەك»، - دەيدى سۇڭگۋىر.
قىزمەتتىك قارۋدىڭ ورنىنا – كۇرەك پەن تىرما. پوليسيا قىزمەتكەرلەرى دە بۇگىن جاعالاۋدا جۇمىسقا كىرىستى. سونىڭ ءبىرى - پوليسيا ينسپەكتورى، پوليسيا مايورى، سوبر قىزمەتكەرى عابيت حالبايەۆ. ول جۇمىس كوپ ۋاقىتىن الاتىنىن، الايدا سونىڭ اراسىندا ۋاقىت تاۋىپ، وتباسىمەن بىرگە تەڭىزگە كەلىپ ۇلگەرەتىنىن ايتتى.
«جاعاجاي مەن قوقىستى كورگەندە، ءبىزدىڭ ازاماتتاردىڭ تابيعاتقا وسىلاي قارايتىنى قاتتى قىنجىلتادى. قوقىستى ءاردايىم جيناپ جۇرەمىز جانە بالالارعا دا ۇنەمى قوقىس تاستاماۋ كەرەكتىگىن تۇسىندىرەمىن، ال قوقىستى تاستاعاندارعا ەسكەرتۋ بەرەمىن. ايتا كەتەيىن، اپتا سايىن ءبولىم عيماراتىنىڭ اۋماعىندا سەنبىلىك وتكىزەمىز، بۇگىن مۇنداي اۋقىمدى شاراعا ءبىرىنشى رەت قاتىسىپ وتىرمىن»، - دەيدى مايور.
قالا تۇرعىندارىمەن بىرگە جاعالاۋدى تازالاۋعا ن. جانتۋرين مۋزىكالىق-دراما تەاترىنىڭ شارۋاشىلىق مەڭگەرۋشىسى گۇلسارا سۇندەتوۆا سەنبىلىككە ءوز سۇيىكتى قالاسى ءۇشىن كەلگەنىن جانە ونى قالا قوناقتارىنا ماقتانىشپەن كورسەتكىسى كەلەتىنىن ايتادى.
«ءبىز جەرىمىزدىڭ تازا بولعانىن جانە جاعالاۋدىڭ ادەمى بولعانىن قالايمىز. ويتكەنى، ادامدار پوليگونعا ەمەس، دەمالىسقا كەلەتىندەي تازالىق كەرەك. باراتىن تۋىستارىمىزعا تازا تەڭىز بەن جاعالاۋدى كورسەتكىم كەلەدى، ويتكەنى تەڭىز - باستى كورىكتى جەرىمىز. مەن ادامداردى وزىنەن قالعان قوقىستاردى جيناپ كەتۋگە شاقىرامىن، وزىڭىزبەن بىرگە جەڭىل پاكەت الا ءجۇرۋ قيىن ەمەس. سونداي-اق، قالامىزدى كۇندە تازا ۇستايتىن سىپىرۋشىلارىمىزعا العىس ايتامىن!».
جاعالاۋدى رەتكە كەلتىرىپ، ىسكەر ارىپتەستەرىمەن كەزدەسكەن مەكەمە قىزمەتكەرلەرى سەنبىلىك كۇنىن تيمبيلدينگ ءىس-شاراسىنا اينالدىرۋدى ۇيعاردى.
«ءبىزدىڭ مەكەمە قوعامدىق تاماقتاندىرۋ سالاسىندا جۇمىس ىستەيدى. بۇگىنگى تاڭدا 50 قىزمەتكەر وسى اۋماقتى تازا جەرگە اينالدىرۋ ءۇشىن ادەمى تەڭىزىمىزدىڭ جاعاسىنا جينالدى. تازالىق وزىمىزدەن، وتباسىمىزدان باستالادى. سوندىقتان ءبىز وسىنداي شارالاردى ءارقاشان قۋانا قولدايمىز. مۇنداي يگى ءىس ۇجىمنىڭ ۇيىمشىلدىعىن ارتتىرادى. ودان بولەك، تازالىق جۇمىستارىن جۇرگىزىپ جاتقاندا باسقا كاسىپورىنداعى ارىپتەستەرمەن كەزدەسىپ، اڭگىمەلەستىك»، – دەيدى «بەرەكەت-ف» ج ش س باس ديرەكتورىنىڭ ورىنباسارى انار كۋلچيكوۆا.
اقتاۋلىق جاستار سەنبىلىككە شىعارماشىلىق شابىتپەن كەلدى. 70-كە جۋىق جاستار جاعالاۋدى تازارتىپ، ءان شىرقاپ، سەنبىلىككە قاتىسۋشىلارعا كەرەمەت كوڭىل-كۇي سىيلادى.
«قالامىزدىڭ ەڭ كورىكتى جەرلەرىنىڭ ءبىرى – جاعالاۋ. ءبىراق، كوپ ادامدار ونى لاستاپ تاستايدى، اسىرەسە تۇننەن كەيىن كوپ قوقىس قالادى. ءبىز ءارقاشان تازالىققا ۇمتىلۋىمىز كەرەك. ءبىزدىڭ مىندەتىمىز – قوعامعا پايدا تيگىزۋ»، – دەيدى وبلىستىق جاستار ساياساتى ماسەلەلەرى باسقارماسىنىڭ ءبولىم باسشىسى ابىلاي فازىلبەك.
سونىمەن قاتار، «تازا قازاقستان» شاراسىنا 150-گە جۋىق سپورتشى، ونىڭ ىشىندە ماڭعىستاۋ وبلىستىق مۇگەدەكتەر سپورت كلۋبىنىڭ 15 مۇشەسى قاتىستى. ولاردىڭ قاتارىندا پاراپاۋەرليفتينگتەن حالىقارالىق دارەجەدەگى سپورت شەبەرى عاني ەسەنتەمىروۆ، بوكستان الەم چەمپيونى بەكزات نۇرداۋلەتوۆ، بوكستان ازيا چەمپيونى بەرىك ءابدىراحمانوۆ، بوكستان الەم چەمپيوناتىنىڭ كۇمىس جۇلدەگەرى ادىلبەك نيازىمبەتوۆ بار.
«بۇگىن سپورتشىلار شەتتە قالماي، سۇيىكتى قالامىزدىڭ كەلبەتىن جاقسارتۋعا جان-جاقتى كومەك كورسەتۋدى ۇيعاردى. ويتكەنى، تۋعان جەردى كوركەيتۋ – ءاربىر ازاماتتىڭ بورىشى. قوقىس پەن ءشوپتى جيناپ، ءۇش جۇك كولىگىنە تيەدىك»، – دەدى عاني ەسەنتەمىروۆ.
سەنبىلىككە وزگەلەرمەن بىرگە ماڭعىستاۋ وبلىسىنىڭ اكىمى نۇرداۋلەت قيلىباي دا شىقتى. ءوڭىر باسشىسى جاعالاۋدى تازالاپ بولعان سوڭ، كۇندەلىكتى قالا تازالىعىن كۇزەتەتىن كوممۋنالدىق قىزمەتشىلەرمەن اڭگىمەلەسىپ، شاي ءىشتى.
«قالا تۇرعىندارىنىڭ بەلسەندىلىگىن ەرەكشە اتاپ ءوتۋ كەرەك. ماڭعىستاۋ – ورتاق ءۇيىمىز. بارلىعىمىز تازا كوشەمەن ءجۇرىپ، تازا جەردە سەرۋەندەگىمىز كەلەدى. ال ول تەك وزىمىزگە باينالىستى. بۇل ەكولوگيالىق مادەنيەتتى قالىپتاستىرۋعا باعىتتالعان ۇلكەن شارا. قورشاعان ورتانى ۇقىپتى ۇستاۋ، ولكەمىزدى قوقىسقا تولتىرماۋ ءارقايسىسىمىزدىڭ مىندەتىمىز. مۇنداي شارالار ءداستۇرلى تۇردە جالعاسىن تابۋى كەرەك»، – دەيدى نۇرداۋلەت يگىلىك ۇلى.
جالپى رەسپۋبليكالىق "تازا قازاقستان" ەكو-ناۋقانى اياسىندا وتكەن اقتاۋداعى اۋقىمدى سەنبىلىك جاعالاۋداعى جارمەڭكەمەن جانە كونسەرتتىك باعدارلامامەن جالعاستى. جاعالاۋدا كيىز ءۇي تىگىلىپ، ەكو-شارانىڭ بارلىق قاتىسۋشىلارىنا ىستىق شاي مەن اس بەرىلدى.
