"Qazaqstan ǵarysh sapary" ulttyq kompaniiasy malaiziialyq investormen arada jasalǵan iri kelisimsharttyń buzylýyna qatysty aqparatqa túsinikteme berdi, dep habarlaidy Dalanews.kz.
Aita ketsek, osy negizde aldynda arnaiy baspasóz máslihatyn uiymdastyrǵan sheteldik kompaniia QazǴaryshSaparymen aradaǵy jobaǵa 20 mlrd teńge salyp úlgergenderin, bul qarajatqa Astanada mektep, turǵyn úi kesheni salynyp, qajetti kommýnikatsiialar tartylǵanyn málimdegen edi. Kásipkerlerdiń aitýynsha, odan ary qarai áli 96 mlrd teńge kóleminde investitsiia salý josparlanǵan.
Ulttyq kompaniia King Development kompaniiasymen 2018 jyly Astanada Ulttyq ǵarysh ortalyǵynyń áleýmettik infraqurylymyn salý jóninde kelisimshart jasalǵanyn naqtylady, dep habarlaidy Informburo.kz. Investorǵa uzaqmerzimge paidalaný úshin 14,5 gekter jer telimi de berilgen eken.
"Alty jyl ishinde josparlanǵan alty turǵyn úi blogynyń bireýi ǵana tolyǵymen salynǵan. Qalǵandarynyń qurylysy belgilengen merzimde jáne qazirgi ýaqytqa deiin aiaqtalmaǵan, tipti tórt blok boiynsha qurylys jumystary kelisken merzimge sai qolǵa alynbaǵan da. Bul aradaǵy qarym-qatynastyń buzylýynyń negizgi sebepteriniń biri boldy, óitkeni obektilerdi tapsyrýdyń belgilengen merzimderi óreskel buzyldy. Onyń ústine, kelisimsharttyń 3.4-tarmaǵyna sáikes, King Development nysanaly qoldanysqa múmkindik beretin infraqurylymdardy damytý úshin jer ýchaskelerine injenerlik jelilerdi óz esebinen salýy mindetti", delingen "Qazaqstan ǵarysh sapary" habarlamasynda.
Sonymen qatar Ulttyq kompaniia investor jaldaý aqysyn belgilengen merzimnen júieli túrde keshiktirip tólegenin de aitady.
"Biz olardyń jaǵdaiymen sanasyp, merzimderdi shegerip, jaldaý sharttaryn jeńildettik. Barlyǵy osyndai jeti qosymsha kelisimge qol qoiyldy, biraq qurylys jumystary eshqashan tolyqtai qalpyna kelgen emes", - deidi ulttyq kompaniiadaǵylar.
