Atyraýda tórt adamdy óltirdi dep aiyptalǵan Sultan Sársemálievke qatysty sot protsesi jalǵasyp jatyr. 2026 jyldyń 2 maýsymynda ótken sot otyrysynda kýálerden jaýap alyndy, dep habarlaidy dalanews.kz.
Sot zalynda qaitys bolǵan Qarabalinder áýletiniń jaqyndary men sottalýshy Sársemálievtiń týystary boldy. Olardyń arasynda sottalýshynyń ákesi Samiǵolla Sársemáliev te otyrdy.
Jergilikti tilshi Janat Moldasheva sot zalynan tikelei efirge shyǵyp, Samiǵolla Sársemálievten pikir aldy. Er adam bolǵan jaǵdaiǵa áli de sene almai júrgenin jetkizdi.
Tilshi odan: “Qudalaryńyzben 2022 jyldan beri aralaspaǵan ekensiz. Ekeýi ajyrasqannan keiin qudalaryńyzdy kórgen joqsyz ba?” – dep surady.
“Kórgen joqpyn. Aralas-quralas bolyp, kelip-ketip júrdi ǵoi. Ol jerde qatynasty qudanyń ózi úzip tastady. Ózi kelip, qyzymdy bólek shyǵaramyn dedi”, – dedi Samiǵolla Sársemáliev.
Ol burynǵy kelini Aqbaianǵa qatysty da pikir bildirdi. Alaida ony jaqsy nemese jaman kelin dep baǵalaýdan bas tartty.
“Bosanǵannan keiin aýyryp jatty. Úidiń ishinde júredi, tamaǵyn ishedi, uiyqtaidy, turady. Balalarymen qarym-qatynasy joq”, – dedi ol.
Buǵan deiin Qarabalinderdiń týysy sottalýshynyń otbasy kóńil aityp, keshirim surap barmaǵanyn aitqan edi. Bul suraqqa Samiǵolla Sársemáliev sol kezde istiń mán-jaiy tolyq belgili bolmaǵanyn alǵa tartty.
“Sol kezde belgisiz boldy, ulym kúdikti boldy. Endi belgili bolyp jatyr. Kýá kisiler jaýap berip jatyr”, – dep jaýap berdi sottalýshynyń ákesi.
