Májilis depýtaty Maqsat Tolyqbai Qazaqstandaǵy avtomektepter júiesindegi «zańdastyrylǵan jemqorlyq» týraly másele kóterip, Ishki ister ministrliginen túsinikteme talap etti, dep habarlaidy dalanews.kz.
Depýtattyń aitýynsha, júrgizýshi kýáligin alǵysy keletin azamattar avtomektepke tirkelgen kezde negizgi oqý aqysynan bólek, esh jerde resmi kórsetilmegen qosymsha tólem jasaýǵa májbúr.
«Zańdastyrylǵan jemqorlyqty toqtatý kerek dep ótkende komitette aitqanmyn. Sodan beri biraz ýaqyt ótti. Degenmen bizge túsip jatqan shaǵymdar kóbeimese azaiǵan joq», - dedi Tolyqbai Májilis otyrysynda.
Onyń sózinshe, ár azamat júrgizýshi kýáligin alý úshin eki jarym ai avtomektepte oqýy tiis. Biraq oqý ornyna kireberiste bólek QR-kod turady jáne azamattar soǵan 8,5 myń teńge tóleýge mindetteledi.
«Biraq avtomektepke kireberiste jeke qr-kod turady. Soǵan 8,5 myń teńge tóleýge mindettisiń. Onyń avtomektepke de qatysy joq», - dedi depýtat.
Tolyqbaidyń málimetinshe, Qazaqstanda jyl saiyn shamamen 670 myń adam júrgizýshi kýáligine tapsyrady. Eger árqaisysy 8,5 myń teńgeden tólese, jyldyq kúmándi aqsha ainalymy 5,6 mlrd teńgege jetedi.
«Bul aqsha úkimetke, IIM júiesine de túspeidi. Ashyq esepte joq. Aldyn ala málimet boiynsha, qarajat shetelde turatyn A. esimdi jekelegen tulǵanyń qaltasyna túsip jatyr», - dep málimdedi májilismen.
Depýtat mundai júieni bir adamnyń óz betinshe uiymdastyrýy múmkin emes ekenin aityp, artynda yqpaldy tulǵalar turýy yqtimal ekenin meńzedi.
«Ony joǵarydan qorǵap otyrǵan bireý bar. Suraq: zańsyz qarjy ainalymyn qashan toqtatasyzdar?» - dep surady Tolyqbai.
Saýalǵa Ishki ister ministriniń orynbasary Sanjar Ádilov jaýap berdi. Onyń aitýynsha, qazir bul máselege bailanysty qyzmettik tekseris bastalǵan.
«Qazir ákimshilik, politsiia tarapynan qyzmettik tekseris bastaldy. Bizdiń ýákiletti organda eshqandai odaqtar kerek emes. Sybailasqan jemqorlyqqa jol bermeý kerek. Osy pikirmen biz tolyq kelisemiz. Tiisti shara qabyldaimyz», - dedi vitse-ministr.
Alaida Májilis kýlýarynda jyl saiyn milliardtaǵan teńge jinaityn «A.» esimdi azamattyń kim ekeni jáne onyń yqtimal bailanystary týraly naqty aqparat aitylǵan joq.
