Qostanai oblysynda óz jubaiy men kámeletke tolmaǵan ulyn óltirgen aýyl turǵyny ómir boiyna bas bostandyǵynan aiyryldy. Bul týraly óńirlik sottyń baspasóz qyzmeti málimdedi, dep habarlaidy Dalanews.kz.
Sot sheshimine sáikes, aiyptalýshy N.-ǵa qylmystyń aýyrlyǵy, onyń qoǵamǵa qaýiptiligi jáne is boiynsha anyqtalǵan mán-jailar eskerilip, jazasyn qylmystyq-atqarý júiesiniń tótenshe qaýipsizdik mekemesinde óteý belgilengen.
Is QR Qylmystyq kodeksiniń 99-baby 2-bóligi 14-tarmaǵynyń 1-tarmaqshasy boiynsha (eki adamdy, onyń ishinde kámeletke tolmaǵandy óltirý) qaraldy.
Tergeý dereginshe, 2025 jylǵy 29 qyrkúiekte Amanqaraǵai aýylynyń turǵyny N. túnde úiinde jubaiyna qyzǵanysh tanytyp, onymen sóilesýge barǵan. Qolyna pyshaq ustaǵan er adamdy osy kezde kámeletke tolmaǵan uly D. toqtatpaq bolǵan. Aiyptalýshy balasyna birneshe ret pyshaq suqqan.
Shý shyqqannan keiin oianǵan jubaiy S. ulyn arashalamaq bolǵanymen, kúdikti oǵan da pyshaqpen birneshe ret soqqy jasaǵan. Aýyr jaraqat saldarynan anasy men balasy oqiǵa ornynda kóz jumdy.
