Qostanai - Qazaqstannyń avtomobil ónerkásibiniń teńdessiz ortalyǵy. Munda eldegi eń iri Allur avtokólik zaýyty ornalasqan.
Árbir shyǵarylǵan kóliktiń, óndiristik jeliniń jáne tehnologiialyq úderistiń artynda adamdardyń eńbegi tur. Búginde kásiporyn elimizdiń túrli óńirinen kelgen mamandardy, injenerlerdi, slesarlar men tehnologtardy biriktirip otyr. Olardyń kópshiligi Qostanaiǵa alǵashynda óndiristik tájiribe nemese oqý baǵdarlamalary aiasynda kelip, keiin avtokólik salasynda mansap qurý úshin osynda qalyp qoiýdy jón kóredi.
Osyndai mamandardyń biri – Allur zaýytynyń kýzovty boiaý tsehyndaǵy boiaýshy-óńdeýshi Kámshat Tileýova. Ol Qostanaiǵa Aqtaý qalasynan qonys aýdarǵan.
Kámshattyń zaýyttaǵy joly stýdent kezinen bastalǵan. Ol Satbayev University ýniversitetimen seriktestik baǵdarlamasy aiasynda tájiribeden ótý úshin kásiporynǵa kelgen. Óndiristik tájiribeden ótetin stýdentterge jatyn oryn men tamaq usynylyp, sonymen qatar jalaqy da tólenedi. Allur zaýytynyń bazasynda mashina jasaý jáne avtomobil jasaý salalary boiynsha alty bazalyq kafedra jumys isteidi jáne 18 bilim berý baǵdarlamasy ázirlengen.
Kámshattyń óndiristik tájiribesi 2024 jyldyń qyrkúieginen 2025 jyldyń mamyryna deiin jalǵasty.
«Bizdi Almatydan tájiribeden ótýge jiberdi. Árqaisymyz túrli tsehtarda jumys istedik: kóptegen stýdentter Kia óndiris jelisinde boldy, al men kýzovty boiaý tsehynda tájiribeden óttim. Tájiribeden keiin diplomymdy qorǵaý úshin Almatyǵa bardym. Biraq biraz ýaqyttan soń Qostanaiǵa qaita oralýdy jón kórdim», – deidi Kámshat.
Diplomyn qorǵaǵannan keiin ol polirovka ýchaskesindegi bos oryn týraly estip, óz kúshin synap kórýge sheshim qabyldaidy. Jańa qalaǵa kóshý ońai sheshim bolmaǵanyn jasyrmaidy.
«Buǵan eki sebep áser etti. Birinshiden – ujym. Áriptesterimmen jaqyn aralasyp kettim, bári maǵan jyly qarym-qatynas tanytty. Ekinshiden – qalanyń ózi. Qostanai tabiǵatymen, aýa raiymen, adamdarymen unady. Zaýytta jas mamandarǵa damý úshin kóptegen múmkindik beriledi. Árine, bastapqyda “qolymnan kele me?” degen kúmán boldy. Biraq dostarymmen, áriptesterimmen sóileskennen keiin bul qadamǵa barǵym keletinin túsindim. Bul men úshin ári mansaptyq, ári jeke ómirlik synaq boldy», – deidi ol.
Qazir Kamshat kýzovty boiaý tsehynda boiaýshy-polirovshik bolyp jumys isteidi. Onyń negizgi mindeti – avtomobil kýzovtaryn kelesi qurastyrý kezeńine jiberer aldynda minsiz kúige jetkizý. Kamshattyń aitýynsha, jumysta áriptesterdiń qoldaýy erekshe mańyzdy.
«Men ártúrli jastaǵy adamdarmen til tabysýdy, komandada jumys isteýdi jáne óz isime jaýapkershilikpen qaraýdy úirendim. Biz árqashan bir-birimizge kómektesemiz. Qazir ózimdi tolyqqandy maman retinde sezinemin jáne zaýyttyń, jalpy salanyń damýyna óz úlesimdi qosyp júrgenimdi túsinemin», – deidi ol.
Allur kompaniiasy birneshe jyldan beri elimizdiń jetekshi ýniversitetteri men beiindi kolledjderinde dýaldy bilim berý baǵdarlamasyn damytyp keledi. Kóptegen stýdentter zaýytta tájiribeden ótkennen keiin osy kásiporynda jumysyn jalǵastyrý týraly sheshim qabyldaidy.
Alaida Qostanai tek jas mamandardy ǵana emes, tájiribeli kásibi kadrlardy da ózine tartyp otyr. Solardyń biri – jetkizýshiler sapasyn basqarý bóliminiń basshysy Áset Súgraliev. Ol Qostanaiǵa Oral qalasynan kóship kelgen.
«Sol kezeńde men avtokólik ónerkásibine aýysý múmkindigin qarastyryp júrgen edim. Allur kompaniiasyndaǵy bos oryndy kórgende, óz tájiribemniń bul kásiporynǵa paidaly bolatynyn túsindim. Sondyqtan birden kompaniia ókilderimen bailanysqa shyqtym», – deidi Áset.
Buǵan deiin ol Oralda, Almatyda, Qazanda jáne Astanada jumys istegen. Onyń aitýynsha, qala aýystyrý – kásibi damýdyń tabiǵi bir bóligi.
Qazir Áset óndiris jelisine jetkiziletin komponentterdiń sapasyn aldyn ala baqylaýǵa jaýapty baǵytty basqarady.
«Bizdiń mindetimiz – jetkizýshilermen júieli jumys júrgizip, komponentterdiń turaqty sapasyn qamtamasyz etý. Biz tek aqaýlardy anyqtap qana qoimai, olardyń sebepterin jetkizýshiler jaǵynda joiý baǵytynda da jumys isteimiz», – deidi ol.
Búginde Kámshat pen Áset sekildi mamandardyń eńbek joly elimizdiń jańa indýstriialyq kartasyn qalyptastyryp keledi. Túrli qaladan jáne ártúrli kásibi tájiribemen kelgen adamdar Qostanaiǵa jinalyp, Qazaqstandaǵy eń iri avtokólik zaýyttarynyń birinde eńbek etýde. Olardyń kásibiligi, damý jolyndaǵy talpynysy men komandalyq rýhynyń arqasynda Allur strategiialyq mańyzy bar kásiporyn retindegi mártebesin nyǵaityp, al Qostanai búkil el boiynsha mamandardy ózine tartatyn ortalyqqa ainalýda.
