Jalpyulttyq sotsial-demokratiialyq partiia sailaýǵa qatyspaitynyn málimdedi dep habarlaidy Dalanews.kz.
Buǵan qosa partiia músheleri sailaý naýqanyn baqylaýdan da bas tartty.
"Bilik oppozitsiiany statist esebinde paidalaǵanǵysy keledi. Biz arqyly daýys beretin aýditoriianyń aýqymyn arttyrmaq. Qosanov? JDSP biliktiń qolbalasy bolmaidy! JSDP biliktiń jobasy atanyp, abyroidan aiyrylǵysy kelmeidi. Sailaýǵa qatyspaimyz, bul qazirgi saiasi jaǵdaiǵa berilgen baǵa. Búgingi júiegi qarsylyq bildirgen túrimiz", – deidi partiia tóraǵasy Ashat Raqymjanov.
Partiianyń sailaýǵa qatyspaýy óz aldyna, saiasi naýqandy baqylaýdan úzildi-kesildi bas tartpaq.
"Baqylaýshy bolǵannan ne qaiyr, ne úmit? Sailaý naýqanyn baqylaýdyń ózi qazirgi júieniń legitimdigin moiyndaýdyń belgisi. Bul naýqan bilik ázirlegen ereje boiynsha ótedi", – deidi Raqymjanov.
Partiianyń basqa da belsendi músheleri tóraǵanyń sózin qostap otyr. "Bul bilik ótkennen sabaq almaidy. Ózgergisi kelmeidi. Ózgeristi talap etken kópshilikti kózge ilmeidi", – deidi olar.
JSDP osy arqyly biliktiń jospary buzyp, saiasi naýqannyń stsenariiin iske alǵysyz qylaryna senimdi.
Partiianyń taǵy bir múshesi, tanymal ekonomist Aidar Álibaev qazirgi júiemen úzeńgi qaǵystyrý múmkin emesin aityp ashynypty. Onyń pikirinshe bul júie daýysty tartyp alýdan taiynbaidy. Ólse de ornyn bosatpaidy. Oppozitsiianyń tuqymyn tuzdai qurtýdy kózdeidi. JSDP-dan ózge saiasi partiialardyń barlyǵy qýyrshaq.
"Adaldyń" aty zatyna sai emes. Asyǵys-úsigis ataýyn ózgertken kommýnister de bilik jobasy. Osynyń bárin halyqtyń kózin baqyraityp qoiyp júzege asyrdy. Uiat qaida, uiat?
Bilik sailaýdyń stsenariiniń áldeqashan ázirlep qoiǵan. Kimge qandai paiyz, qansha oryn beriletini kúni buryn belgilengen.
Daýys urlaý búgingi júie úshin qalypty úrdis. Sailaý nátijesi biliktiń ushar basyndaǵy at tóbelindei topqa jumbaq emes. Jurtty jyndy qylyp otyr.
Óz basym boikot degenge jan-tánimmen qarsymyn. Alaida amal qaisy, bul partiiada jalǵyz meniń daýsym eshteńe sheshpeidi. Kópshilik bar, kóptiń sózi bar. Olardan asyp kete almaimyn. Jaǵdaidy qabyldaýdan ózge jol joq. Qaitalap aitaiyn, boikotty quptamaimyn, alaida sezde qabyldanǵan ortaq sheshimdi qabyldaimyn", – dedi Álibaev.
Partiia músheleri bul jolǵy naýqandy umytyp, kelesi sailaýǵa qamdaný kerek degen uiǵarymǵa keldi. Sezde partiianyń 32 múshesi boikotty qoldap daýys berdi, úsh adam qarsy shyqty, beseýi qalys qaldy.
"Mundai sheshimge kelý ońai bolǵan joq. Bárine ýaqyt tóreshi. Bizdiń sheshimniń durystyǵyn tarih tarazylaityn bolady. Bilik bizdi aiaqtan shalýmen keledi. Kór de turyńyzdar, kelesi jyly JSDP eńse tiktep, saiasi alańǵa qaita oralady. Ózgerý kerekpiz, ózgeris kerek", – dedi Raqymjanov.
