Ordabasy aýdanynyń «Qurmetti azamaty», «Ordabasy ottary» gazetiniń redaktory, ardager ustaz Núriddin Shámshiuly ómirden ótti.
Núriddin Shámshiuly 1949 jyly 8 sáýirde Túrkistan oblysy Ordabasy aýdanynda dúniege kelgen.
1966 jyly Temirlan aýylyndaǵy Amangeldi atyndaǵy orta mektepti támamdap, sol jyly Shymkent pedagogikalyq institýtynyń filologiia fakýltetine oqýǵa túsken. Joǵary oqý ornyn 1970 jyly aiaqtaǵan.
Eńbek jolyn ustazdyqtan bastaǵan
Núriddin Shámshiuly eńbek jolyn 1970 jyly muǵalim bolyp bastaǵan.
1974 jyldan bastap sol kezdegi «Kommýnizm tańy» – «Zaria kommýnizma», qazirgi «Ordabasy ottary» aýdandyq gazetinde tilshi jáne bólim meńgerýshisi qyzmetterin atqarǵan.
1985 jyldan bastap aýdandyq bilim bóliminde ádisker, mektep inspektory, bas maman, ádistemelik kabinet meńgerýshisi, bólim basshysynyń orynbasary jáne mektep direktory qyzmetterinde eńbek etken.
Zeinetke shyqqannan keiin de qalamyn tastamady
Zeinet jasyna shyqqannan keiin de Núriddin Shámshiuly jýrnalistikadan qol úzbegen.
Ol «Ordabasy ottary» gazetiniń redaktory retinde aýdannyń qoǵamdyq, rýhani jáne mádeni ómirine qatysty maqalalar jazyp, óńirdiń damýyna óz úlesin qosyp keldi.
Núriddin Shámshiuly Álem halyqtary jazýshylar uiymynyń jáne Qazaqstan Jýrnalister odaǵynyń múshesi, Qazaqstan Pedagogikalyq akademiiasynyń professory, Qazaqstannyń Qurmetti jýrnalisi bolǵan.
Qalamgerdiń derekti hikaiattary, áńgimeleri, esseleri men tanymdyq baǵyttaǵy kitaptary jaryq kórgen.
Marapattary
Núriddin Shámshiulynyń bilim berý, jýrnalistika jáne qoǵamdyq saladaǵy kópjyldyq eńbegi birqatar memlekettik jáne salalyq marapatpen atap ótilgen.
Ol Qazaqstan Respýblikasy bilim berý isiniń úzdigi, Ybyrai Altynsarin tósbelgisiniń iegeri atanǵan.
Sondai-aq Qazaqstan Táýelsizdiginiń 20 jáne 25 jyldyǵyna arnalǵan mereitoilyq medaldarmen, 2021 jyly «Oblysqa sińirgen eńbegi úshin» medalimen marapattalǵan.
Memleket basshysy Qasym-Jomart Toqaevtyń Jarlyǵymen «Eren eńbegi úshin» medaline ie bolǵan.
