Qazaqstan úkimeti aýqatty otbasylarǵa beriletin áleýmettik kómekti qysqartý arqyly 2027 jyly 700 mlrd teńge, al aldaǵy úsh jylda shamamen 2,5 trln teńge únemdeýdi josparlap otyr, dep habarlaidy dalanews.kz.
Premer-ministr Oljas Bektenovtiń aitýynsha, 2027 jylǵy 1 qańtardan bastap áleýmettik qoldaý kórsetý kezinde azamattardyń naqty muqtajdyǵy negizgi ólshemge ainalady.
Úkimet basshysy qazirgi júiede tabysy joǵary jáne turmysy tómen kópbalaly otbasylarǵa birdei qoldaý kórsetilýin ádiletsiz dep sanaitynyn aitty. Onyń pikirinshe, memleket kómekti óz kúnin ózi kóre almaityn azamattarǵa baǵyttaýy kerek.
«Jaǵdaiy jaqsy, ózin-ózi qamtamasyz etýge múmkindigi bar adamdar memleket kómegine súienbeýi kerek, olar óz kúshine senýi tiis», – dedi Bektenov Quryltai otyrysynda.
Premer-ministrdiń túsindirýinshe, áleýmettik kómek turaqty tabys kózine ainalmaýy kerek. Onyń maqsaty – qiyn jaǵdaiǵa tap bolǵan azamattarǵa qoldaý kórsetip, keiin olardyń óz betinshe kún kórýine múmkindik berý.
Úkimettiń josparyna sáikes, jańa tásil áleýmettik qoldaýǵa bólinetin qarajatty qaita bólýge múmkindik beredi. Alaida naqty qandai tólemder men járdemaqylar qysqaratyny jáne otbasylardyń tabysy qandai ólshemder boiynsha baǵalanatyny týraly tolyq aqparat berilgen joq.
