جالپىۇلتتىق سوسيال-دەموكراتيالىق پارتيا سايلاۋعا قاتىسپايتىنىن مالىمدەدى دەپ حابارلايدى Dalanews.kz.
بۇعان قوسا پارتيا مۇشەلەرى سايلاۋ ناۋقانىن باقىلاۋدان دا باس تارتتى.
"بيلىك وپپوزيسيانى ستاتيست ەسەبىندە پايدالاعانعىسى كەلەدى. ءبىز ارقىلى داۋىس بەرەتىن اۋديتوريانىڭ اۋقىمىن ارتتىرماق. قوسانوۆ؟ جدسپ بيلىكتىڭ قولبالاسى بولمايدى! جسدپ بيلىكتىڭ جوباسى اتانىپ، ابىرويدان ايىرىلعىسى كەلمەيدى. سايلاۋعا قاتىسپايمىز، بۇل قازىرگى ساياسي جاعدايعا بەرىلگەن باعا. بۇگىنگى جۇيەگى قارسىلىق بىلدىرگەن ءتۇرىمىز"، – دەيدى پارتيا ءتوراعاسى اسحات راقىمجانوۆ.
پارتيانىڭ سايلاۋعا قاتىسپاۋى ءوز الدىنا، ساياسي ناۋقاندى باقىلاۋدان ۇزىلدى-كەسىلدى باس تارتپاق.
"باقىلاۋشى بولعاننان نە قايىر، نە ءۇمىت؟ سايلاۋ ناۋقانىن باقىلاۋدىڭ ءوزى قازىرگى جۇيەنىڭ لەگيتيمدىگىن مويىنداۋدىڭ بەلگىسى. بۇل ناۋقان بيلىك ازىرلەگەن ەرەجە بويىنشا وتەدى"، – دەيدى راقىمجانوۆ.
پارتيانىڭ باسقا دا بەلسەندى مۇشەلەرى ءتوراعانىڭ ءسوزىن قوستاپ وتىر. "بۇل بيلىك وتكەننەن ساباق المايدى. وزگەرگىسى كەلمەيدى. وزگەرىستى تالاپ ەتكەن كوپشىلىكتى كوزگە ىلمەيدى"، – دەيدى ولار.
جسدپ وسى ارقىلى بيلىكتىڭ جوسپارى بۇزىپ، ساياسي ناۋقاننىڭ سەنارييىن ىسكە العىسىز قىلارىنا سەنىمدى.
پارتيانىڭ تاعى ءبىر مۇشەسى، تانىمال ەكونوميست ايدار الىبايەۆ قازىرگى جۇيەمەن ۇزەڭگى قاعىستىرۋ مۇمكىن ەمەسىن ايتىپ اشىنىپتى. ونىڭ پىكىرىنشە بۇل جۇيە داۋىستى تارتىپ الۋدان تايىنبايدى. ولسە دە ورنىن بوساتپايدى. وپپوزيسيانىڭ تۇقىمىن تۇزداي قۇرتۋدى كوزدەيدى. جسدپ-دان وزگە ساياسي پارتيالاردىڭ بارلىعى قۋىرشاق.
"ادالدىڭ" اتى زاتىنا ساي ەمەس. اسىعىس-ۇسىگىس اتاۋىن وزگەرتكەن كوممۋنيستەر دە بيلىك جوباسى. وسىنىڭ ءبارىن حالىقتىڭ كوزىن باقىرايتىپ قويىپ جۇزەگە اسىردى. ۇيات قايدا، ۇيات؟
بيلىك سايلاۋدىڭ سەناريينىڭ الدەقاشان ازىرلەپ قويعان. كىمگە قانداي پايىز، قانشا ورىن بەرىلەتىنى كۇنى بۇرىن بەلگىلەنگەن.
داۋىس ۇرلاۋ بۇگىنگى جۇيە ءۇشىن قالىپتى ءۇردىس. سايلاۋ ناتيجەسى بيلىكتىڭ ۇشار باسىنداعى ات توبەلىندەي توپقا جۇمباق ەمەس. جۇرتتى جىندى قىلىپ وتىر.
ءوز باسىم بويكوت دەگەنگە جان-تانىممەن قارسىمىن. الايدا امال قايسى، بۇل پارتيادا جالعىز مەنىڭ داۋسىم ەشتەڭە شەشپەيدى. كوپشىلىك بار، كوپتىڭ ءسوزى بار. ولاردان اسىپ كەتە المايمىن. جاعدايدى قابىلداۋدان وزگە جول جوق. قايتالاپ ايتايىن، بويكوتتى قۇپتامايمىن، الايدا سەزدە قابىلدانعان ورتاق شەشىمدى قابىلدايمىن"، – دەدى الىبايەۆ.
پارتيا مۇشەلەرى بۇل جولعى ناۋقاندى ۇمىتىپ، كەلەسى سايلاۋعا قامدانۋ كەرەك دەگەن ۇيعارىمعا كەلدى. سەزدە پارتيانىڭ 32 مۇشەسى بويكوتتى قولداپ داۋىس بەردى، ءۇش ادام قارسى شىقتى، بەسەۋى قالىس قالدى.
"مۇنداي شەشىمگە كەلۋ وڭاي بولعان جوق. بارىنە ۋاقىت تورەشى. ءبىزدىڭ شەشىمنىڭ دۇرىستىعىن تاريح تارازىلايتىن بولادى. بيلىك ءبىزدى اياقتان شالۋمەن كەلەدى. كور دە تۇرىڭىزدار، كەلەسى جىلى جسدپ ەڭسە تىكتەپ، ساياسي الاڭعا قايتا ورالادى. وزگەرۋ كەرەكپىز، وزگەرىس كەرەك"، – دەدى راقىمجانوۆ.
