Sherzat Bolattyń ólimine qatysty Taldyqorǵanda ótip jatqan sot protsesinde jábirlenýshi taraptyń múddesin qorǵap júrgen advokattar tobynyń arasynda kelispeýshilik týyndap, birneshe qorǵaýshy isten shettetildi. Bul týraly áleýmettik jelide advokat Baǵdat Amandosuly málim etti, dep habarlaidy Dalanews.kz.
Onyń sózinshe, qorǵaýshylar tobyn basqaryp otyrǵan Meiirman Shekeevtiń ainalasyndaǵy kei tulǵalar kásibi emes, jeke ambitsiiaǵa negizdelgen áreketke jol bergen.
"Osy iske úlken jaýapkershilikpen keldim. 10 jyldan beri túrli sot protsesterine qatysyp júrgen tájiribeli qorǵaýshymyn. Bul isti de bar yntammen zerttep, aptasyna eki ret sot otyrysyna qatysyp, qalǵan kúnderi daiyndyqpen ainalystym. Jábirlenýshi taraptyń múddesin shyn nietpen qorǵaýǵa tyrystym. Biraq bul isti ataq úshin qolǵa alǵandar meniń jumysym men nietime kedergi keltirdi", – deidi ol.
Baǵdat Amandosuly sot protsesi – “shoý emes, adam taǵdyry sheshiletin mańyzdy alań” ekenin eske salyp, áriptesteriniń tarapynan jasalǵan qysymdy kásibilik emes, ego men monopoliia dep baǵalady.
"Sotta tek men sóileýim kerek, men ǵana suhbat beremin, kim qarsy shyqsa – shettetiledi» degen talaptar aityldy. Mundai kózqaras pen áreketke tózý múmkin emes. Men bul iske bireýdiń imidjin kóterý úshin emes, shyndyqty tabý úshin qatystym", – deidi advokat.
Baǵdat Amandosulynyń aitýynsha, buǵan deiin qorǵaýshylar Jandos Palmanov pen Nurbolat Ibraev ta shettetilgen.
"Halyq maǵan senim artty. Isten shettetilgenim sol senimdi aqtai almadym ba degen ókinish týdyrady. Men barymdy saldym. Biraq bireýdiń kóleńkesinde qalǵym kelmeidi. Bul qandy is – haip quralyna ainalmaýy tiis", – dep túiindedi ol.
Advokat ózin kimniń shettetkenin naqty atamaǵanymen, áleýmettik jeli qoldanýshylary bul jaǵdaidy qorǵaýshylar tobynyń jetekshisi Meiirman Shekeevpen bailanystyryp otyr.
