شەرزات بولاتتىڭ ولىمىنە قاتىستى تالدىقورعاندا ءوتىپ جاتقان سوت پروسەسىندە جابىرلەنۋشى تاراپتىڭ مۇددەسىن قورعاپ جۇرگەن ادۆوكاتتار توبىنىڭ اراسىندا كەلىسپەۋشىلىك تۋىنداپ، بىرنەشە قورعاۋشى ىستەن شەتتەتىلدى. بۇل تۋرالى الەۋمەتتىك جەلىدە ادۆوكات باعدات اماندوس ۇلى ءمالىم ەتتى، دەپ حابارلايدى Dalanews.kz.
ونىڭ سوزىنشە، قورعاۋشىلار توبىن باسقارىپ وتىرعان مەيىرمان شەكەيەۆتىڭ اينالاسىنداعى كەي تۇلعالار كاسىبي ەمەس، جەكە امبيسياعا نەگىزدەلگەن ارەكەتكە جول بەرگەن.
"وسى ىسكە ۇلكەن جاۋاپكەرشىلىكپەن كەلدىم. 10 جىلدان بەرى ءتۇرلى سوت پروسەستەرىنە قاتىسىپ جۇرگەن تاجىريبەلى قورعاۋشىمىن. بۇل ءىستى دە بار ىنتاممەن زەرتتەپ، اپتاسىنا ەكى رەت سوت وتىرىسىنا قاتىسىپ، قالعان كۇندەرى دايىندىقپەن اينالىستىم. جابىرلەنۋشى تاراپتىڭ مۇددەسىن شىن نيەتپەن قورعاۋعا تىرىستىم. ءبىراق بۇل ءىستى اتاق ءۇشىن قولعا العاندار مەنىڭ جۇمىسىم مەن نيەتىمە كەدەرگى كەلتىردى"، – دەيدى ول.
باعدات اماندوس ۇلى سوت پروسەسى – “شوۋ ەمەس، ادام تاعدىرى شەشىلەتىن ماڭىزدى الاڭ” ەكەنىن ەسكە سالىپ، ارىپتەستەرىنىڭ تاراپىنان جاسالعان قىسىمدى كاسىبيلىك ەمەس، ەگو مەن مونوپوليا دەپ باعالادى.
"سوتتا تەك مەن سويلەۋىم كەرەك، مەن عانا سۇحبات بەرەمىن، كىم قارسى شىقسا – شەتتەتىلەدى» دەگەن تالاپتار ايتىلدى. مۇنداي كوزقاراس پەن ارەكەتكە ءتوزۋ مۇمكىن ەمەس. مەن بۇل ىسكە بىرەۋدىڭ ءيميدجىن كوتەرۋ ءۇشىن ەمەس، شىندىقتى تابۋ ءۇشىن قاتىستىم"، – دەيدى ادۆوكات.
باعدات اماندوس ۇلىنىڭ ايتۋىنشا، بۇعان دەيىن قورعاۋشىلار جاندوس پالمانوۆ پەن نۇربولات يبرايەۆ تا شەتتەتىلگەن.
"حالىق ماعان سەنىم ارتتى. ىستەن شەتتەتىلگەنىم سول سەنىمدى اقتاي المادىم با دەگەن وكىنىش تۋدىرادى. مەن بارىمدى سالدىم. ءبىراق بىرەۋدىڭ كولەڭكەسىندە قالعىم كەلمەيدى. بۇل قاندى ءىس – حايپ قۇرالىنا اينالماۋى ءتيىس"، – دەپ تۇيىندەدى ول.
ادۆوكات ءوزىن كىمنىڭ شەتتەتكەنىن ناقتى اتاماعانىمەن، الەۋمەتتىك جەلى قولدانۋشىلارى بۇل جاعدايدى قورعاۋشىلار توبىنىڭ جەتەكشىسى مەيىرمان شەكەيەۆپەن بايلانىستىرىپ وتىر.
