Astana qalasynyń qylmystyq ister jónindegi mamandandyrylǵan aýdanaralyq soty eks-ministr Arystanbek Muhamediuly, onyń áieli Ǵaliia Ysqaqova men advokaty Mýstahim Túleev para berýge oqtalǵany, deldaldyq jáne alaiaqtyq úshin sot úkimin shyǵardy, - dep habarlaidy Dalanews.kz.
Tergeý barysynda Muhamediuly asa iri mólsherde para berýge oqtaldy dep (QK 24-babynyń 3-bóligi – 367-babynyń 4-bóligi), Ysqaqova – paraqorlyqqa deldaldyq jasady dep (QK 368-babynyń 1-bóligi) jáne T. – asa iri mólsherde alaiaqtyq jasady dep (QK 190-baby 4-bóliginiń 2) tarmaǵy) aiyptaldy.
Qandai aiyp taǵylyp otyr?
Muhamediuly 2022 jyldyń jeltoqsanynda Astana qalasynyń tergeý izoliatorynda bolǵan kezinde qamaýdan bosatylyp, "Diplomat" qonaqúiin menshiginde ustap qalǵysy kelip, advokat Túleev arqyly laýazymdy tulǵalarǵa asa iri mólsherde para berýge niet bildirdi, bul rette óziniń jubaiy Ysqaqovany paraqorlyqqa deldal retinde tartýǵa sheshim qabyldady. Ári qarai, jubaiy Muhamediulymen kelisip, Túleevpen kelissózder júrgizip, zańsyz aqshalai syiaqyny laýazymdy adamdarǵa berý týraly kelisimdi júzege asyrý maqsatynda Túleevke Muhamediulynyń para berýge daiyn ekenin aitqan. 2022 jyldyń jeltoqsanynda Ǵaliia Ysqaqova kafede "Diplomat" qonaqúiiniń máselesin sheshý úshin advokat Túleevke 140 myń AQSh dollaryn jeke ózi tabystady.
2023 jyldyń qańtarynda jubaiy Túleevtiń kóliginde deldal rólin atqara otyryp, Muhamediulyna qatysty bultartpaý sharasyn ózgertý úshin 120 myń AQSh dollaryn ózi tapsyrdy. 2023 jyldyń sáýirinde Ǵaliia Ysqaqova júrgizýshisi arqyly advokat Mýstahim Túleevke jazasyn jeńildetý úshin taǵy da 100 myń AQSh dollaryn berdi.
2023 jyldyń maýsymynda ol taǵy da deldal rólin atqara otyryp, óziniń uly arqyly Túleevke 27 mln. teńge jáne 40 myń AQSh dollary somasynda aqsha berdi. Túleev aldaý jáne senimge qiianat jasaý arqyly aqshany iemdenip, olardy óz qalaýy boiynsha basqardy.
Prokýrorlar ne deidi?
- Sotta prokýror aiyptaýdy qoldap, Muhamediuyna QK-niń 58-babyn qoldana otyryp, 12 jylǵa bas bostandyǵynan aiyrý jazasyn taǵaiyndaýdy;
- Advokat Túleevti 6 jyl 8 ai bas bostandyǵynan aiyrýdy;
- Muhamediulynyń áieli Ǵaliia Ysqaqovany 1 jyl 6 ai bas bostandyǵynan aiyrýdy surady.
Úsheýi de taǵylǵan aiypty moiyndamai, olardy aqtaýdy suraǵan.
Sottalýshylardyń kinási kýágerlerdiń aiǵaqtarymen, saraptamalardyń qorytyndylarymen, jasyryn tergeý áreketteriniń nátijelerimen jáne qylmystyq istiń basqa da materialdarymen dáleldengen.
Sot sheshimi
Sot Mýstahim Túleevtiń kishkentai balalary bolýyn, Ysqaqova onyń asyraýynda qart anasynyń bolýyn qylmystyq jaýaptylyq pen jazany jeńildetetin mán-jailar retinde tanydy. Muhamediulyna qylmystyq jaýaptylyq pen jazany jeńildetetin mán-jailar anyqtalǵan joq. Sottalýshylardyń jaýapkershiligi men jazasyn aýyrlatatyn mán-jailar anyqtalmady.
Sot úkimimen Arystanbek Muhamediuly asa iri mólsherde para berýge oqtalǵany úshin kináli dep tanylyp, QK-niń 58-babynyń 3 jáne 6-bólikteri negizinde, 20.06.2023 jylǵy Astana qalasynyń qylmystyq ister jónindegi aýdanaralyq sotynyń úkimimen taǵaiyndalǵan qatań jazany neǵurlym qatań jazaǵa sińirý jolymen qylmystyq quqyq buzýshylyqtar jiyntyǵy boiynsha ómir boiyna memlekettik qyzmette laýazymdardy atqarýǵa tyiym salyna otyryp, 11 jylǵa bas bostandyǵynan aiyryldy.
Onyń áieli Ǵaliia Ysqaqova paraqorlyqqa deldaldyq jasaǵany úshin kináli dep tanylyp (QK 368-babynyń 1-bóligi), ómir boiy memlekettik qyzmette qyzmet atqarýǵa tyiym salynyp, 6 aiǵa bas bostandyǵynan aiyryldy. Advokat Túleev asa iri mólsherde alaiaqtyq jasaǵany úshin kináli dep tanylyp (QK 190-baby 4-bóliginiń 2) tarmaǵy), 10 jyl merzimge advokattyq qyzmetpen ainalysý quqyǵynan aiyryla otyryp, 6 jyl 8 aiǵa bas bostandyǵynan aiyryldy.
Úkim zańdy kúshine engen joq.
