Qonaev qalasynda turǵyndar sany is júzinde emes, tek formaldy túrde azaiǵan. Bul ózgeris ákimshilik-aýmaqtyq bólinispen bailanysty, dep habarlaidy Dalanews.kz.
Buǵan deiin Data Hub resýrsy 2024 jyldyń sáýiri men 2025 jyldyń sáýiri aralyǵynda halyq sany 8,2%-ǵa tómendep, 65,9 myń adamǵa deiin qysqarǵanyn habarlap, Qonaevty eldegi halyq sany eń kóp azaiǵan qala dep ataǵan edi.
Alaida ákimdik bul málimetti Kýrsiv basylymyna naqtylai otyryp, halyq sanynyń kemýi Qonaevqa qaraityn Zarechnyi men Arna aýyldarynyń jańadan qurylǵan Alataý qalasynyń quramyna ótýimen bailanysty ekenin aitty.
“Eger 2023 jyly qalada 70 512 adam tursa, 2024 jyly bul kórsetkish 65 024 adamdy qurady. Alaida qazir halyq sany qaita ósip keledi – qazirgi kezde qalada 65 934 adam turady”, – delingen ákimdiktiń Kýrsiv basylymyna bergen resmi habarlamasynda.
Sonymen qatar ákimdik Qonaevty ómir súrýge qolaisyz qala dep sanaý – qate túsinik ekenin atap ótti. Oblys ortalyǵynyń ákimdigi elde jalǵan aqparat taratý men áleýmettik ahýaldy shielenistirýge itermeleý áreketteri zań júzinde jaýapkershilikke ákeletinin eskertti.
Aita keteiik, 2024 jyldyń qańtar aiynda Almaty oblysyndaǵy Jetigen aýyly Alataý qalasy bolyp ózgertilgen edi. Qazaqstan Prezidenti Qasym-Jomart Toqaevtyń jarlyǵyna sáikes, Alataýǵa oblystyq mańyzy bar qala mártebesi berildi.
Al Qonaev qalasy buǵan deiin Qapshaǵai dep atalyp kelgen. Qalany qaita ataý 2022 jyldyń mamyr aiynda júzege asqan bolatyn.
