Áskerde qaza tapqan Ulttyq ulan sarbazynyń anasy ulynyń ólimine qatysty ádil ári ashyq tergeý júrgizýdi talap etip, videoúndeý jasady, dep habarlaidy Dalanews.kz.
"Men – 2023 jyly Astana qalasyndaǵy Ulttyq ulanǵa shaqyrtylǵan sarbaz Sultanov Qaisardyń anasy Sáýle Tleýbergenova. Ulymdy ofitser aiaýsyz jáne qatygezdikpen atyp óltirdi. Tergeý bul oqiǵany ózine qol jumsaý dep jappaq. Biraq men munymen kelispeimin. Qolymda aiǵaqtar men saraptama qorytyndylary bar. Ulymnyń ieginen eki oqtyń izi anyqtaldy. Alǵashqy atylǵan oq kezinde onyń tili, tańdaiy, mańdai bóligi, bas miy men súiekteri qatty zaqymdanǵan. Sodan soń bes-alty minýttan keiin ekinshi oq atylǵan", – dedi marqumnyń anasy videoúndeýinde.
Eske salaiyq, Qaisar Sultanov 2023 jyldyń qazan aiynda 6636 áskeri bóliminde boryshyn ótep júrgende qaza tapqan. Qazirgi ýaqytta tergeý jumystary jalǵasýda. Sarbazdyń anasy tergeýdiń sozylyp jatqanyn jáne oqiǵanyń jai-japsary jasyrylady dep kúdiktenip otyr.
Bilik 9 qazan kúni 6636 áskeri bóliminiń sarbazy, qatardaǵy jaýynger Qaisar Sultanovtyń áskeri qalashyqty kúzetý kezinde túngi ýaqytta óz beketinde basynan oq jaraqatyn alǵan kúiinde tabylǵanyn habarlaǵan bolatyn.
Aita keteiik, buǵan deiin Jetisý oblysynda áskeri qyzmetin ótep júrgen sarbaz Dastan Qurmanbektiń qaza tapqany týraly da jazǵan edik.
Resmi derek boiynsha, onyń qazasy "óz-ózine qol jumsaý" dep tanylǵan. Alaida marqumnyk ata-anasy bul nusqaǵa senbeidi.
Olar Qaz365 agenttigine oqiǵanyń mán-jaiyn baiandap bergen bolatyn.
"Balamnyń ózin-ózi óltirýi múmkin emes. Bir kún buryn ǵana baryp qaittyq, bári jaqsy edi," – dedi marqumnyń ákesi.
Al anasy Dastandy óte tózimdi, sabyrly bala bolǵanyn aitady.
"Úide aýyrsa da eshkimge aitpaityn. Áskerde qiyn bolaryn bilse de, 'shydaimyn' dep ketken edi," – deidi ol.
Ata-anasynyń aitýynsha, qaiǵyly jaǵdai aldynda Dastan telefon arqyly úsh kún boiy uiyqtamai, sýyqta nariadta turǵanyn aitqan. Olar ulymen kezdesý úshin arnaiy baryp qaitqan soń, erteńine onyń qaza tapqany týraly sýyq habar jetken.
Qurlyq áskerleri basshylyǵynyń málimetinshe, sarbaz qarýmen jumys isteý erejelerin saqtamaǵandyqtan jaraqat alǵan. Oqiǵanyń naqty sebepterin arnaiy komissiia anyqtap jatyr.
