اسكەردە قازا تاپقان ۇلتتىق ۇلان ساربازىنىڭ اناسى ۇلىنىڭ ولىمىنە قاتىستى ءادىل ءارى اشىق تەرگەۋ جۇرگىزۋدى تالاپ ەتىپ، ۆيدەوۇندەۋ جاسادى، دەپ حابارلايدى  Dalanews.kz.

"مەن – 2023 جىلى استانا قالاسىنداعى ۇلتتىق ۇلانعا شاقىرتىلعان سارباز سۇلتانوۆ قايساردىڭ اناسى ساۋلە تلەۋبەرگەنوۆا. ۇلىمدى وفيسەر اياۋسىز جانە قاتىگەزدىكپەن اتىپ ءولتىردى. تەرگەۋ بۇل وقيعانى وزىنە قول جۇمساۋ دەپ جاپپاق. ءبىراق مەن مۇنىمەن كەلىسپەيمىن. قولىمدا ايعاقتار مەن ساراپتاما قورىتىندىلارى بار. ۇلىمنىڭ يەگىنەن ەكى وقتىڭ ءىزى انىقتالدى. العاشقى اتىلعان وق كەزىندە ونىڭ ءتىلى، تاڭدايى، ماڭداي بولىگى، باس ميى مەن سۇيەكتەرى قاتتى زاقىمدانعان. سودان سوڭ بەس-التى مينۋتتان كەيىن ەكىنشى وق اتىلعان"، – دەدى مارقۇمنىڭ اناسى ۆيدەوۇندەۋىندە.

ەسكە سالايىق، قايسار سۇلتانوۆ 2023 جىلدىڭ قازان ايىندا 6636 اسكەري بولىمىندە بورىشىن وتەپ جۇرگەندە قازا تاپقان. قازىرگى ۋاقىتتا تەرگەۋ جۇمىستارى جالعاسۋدا. ساربازدىڭ اناسى تەرگەۋدىڭ سوزىلىپ جاتقانىن جانە وقيعانىڭ جاي-جاپسارى جاسىرىلادى دەپ كۇدىكتەنىپ وتىر.

بيلىك 9 قازان كۇنى 6636 اسكەري ءبولىمىنىڭ ساربازى، قاتارداعى جاۋىنگەر قايسار سۇلتانوۆتىڭ اسكەري قالاشىقتى كۇزەتۋ كەزىندە تۇنگى ۋاقىتتا ءوز بەكەتىندە باسىنان وق جاراقاتىن العان كۇيىندە تابىلعانىن حابارلاعان بولاتىن.

ايتا كەتەيىك، بۇعان دەيىن جەتىسۋ وبلىسىندا اسكەري قىزمەتىن وتەپ جۇرگەن سارباز داستان قۇرمانبەكتىڭ قازا تاپقانى تۋرالى دا جازعان ەدىك. 

رەسمي دەرەك بويىنشا، ونىڭ قازاسى "وز-وزىنە قول جۇمساۋ" دەپ تانىلعان. الايدا مارقۇمنىك اتا-اناسى بۇل نۇسقاعا سەنبەيدى.

ولار Qaz365 اگەنتتىگىنە وقيعانىڭ ءمان-جايىن بايانداپ بەرگەن بولاتىن. 

"بالامنىڭ ءوزىن-وزى ءولتىرۋى مۇمكىن ەمەس. ءبىر كۇن بۇرىن عانا بارىپ قايتتىق، ءبارى جاقسى ەدى،" – دەدى مارقۇمنىڭ اكەسى.

ال اناسى داستاندى وتە ءتوزىمدى، سابىرلى بالا بولعانىن ايتادى.

"ۇيدە اۋىرسا دا ەشكىمگە ايتپايتىن. اسكەردە قيىن بولارىن بىلسە دە، 'شىدايمىن' دەپ كەتكەن ەدى،" – دەيدى ول.

اتا-اناسىنىڭ ايتۋىنشا، قايعىلى جاعداي الدىندا داستان تەلەفون ارقىلى ءۇش كۇن بويى ۇيىقتاماي، سۋىقتا ناريادتا تۇرعانىن ايتقان. ولار ۇلىمەن كەزدەسۋ ءۇشىن ارنايى بارىپ قايتقان سوڭ، ەرتەڭىنە ونىڭ قازا تاپقانى تۋرالى سۋىق حابار جەتكەن. 

قۇرلىق اسكەرلەرى باسشىلىعىنىڭ مالىمەتىنشە، سارباز قارۋمەن جۇمىس ىستەۋ ەرەجەلەرىن ساقتاماعاندىقتان جاراقات العان. وقيعانىڭ ناقتى سەبەپتەرىن ارنايى كوميسسيا انىقتاپ جاتىر.