Ata-analardyń óz balalaryn egýden bas tartýy astanalyqtar arasynda vaksınamen basqarylatyn ınfeksıalarmen syrqattanýshylyqtyń ósýine alyp keledi. Bul týraly komýnıkasıalar qyzmetinde ótken brıfıńte Astananyń bas memlekettik sanıtarlyq dárigeri Sarhat Beısenova aıtty, dep habarlaıdy elorda ákimdiginiń resmı saıty.

Bıylǵy 6 aıdyń qorytyndysy boıynsha Astana qalasynyń turǵyndaryn ımmýndaýmen qamtý monıtorıńiniń derekteri boıynsha 1 jasqa deıingi balalardy dıfterıaǵa, sirespege, kókjótelge, gemofıldi ınfeksıaǵa, polıomıelıtke, pnevmokokty ınfeksıaǵa, 16-17 jas aralyǵyndaǵy jasóspirimderdiń dıfterıasyna jáne sirespege qarsy ekpelermen josparly qamtýǵa qol jetkizildi.

«Nátıjesinde bıylǵy 6 aıda kókjóteldiń 435 rastalǵan jaǵdaıy tirkeldi, 14 jasqa deıingi balalar arasynda – 417 (kórsetkish – 100 myń turǵynǵa shaqqanda 30,5), 2023 jyly kókjóteldiń 5 jaǵdaıy tirkeldi, ósim 82 ese. Aýrýdyń negizgi sebebi 54% nemese 234 jaǵdaıda ata-analardyń kókjótelge qarsy profılaktıkalyq egýden bas tartýy bolyp sanalady», - dedi elordanyń sanıtarlyq dárigeri.

«Ótken jyldyń naýryz aıynan bastap elordada qyzylshamen syrqattanýshylyqtyń ósýi baıqaldy. Bıylǵy 6 aıda qyzylshanyń 1541 rastalǵan jaǵdaıy tirkeldi, onyń ishinde 14 jasqa deıingi balalar arasynda 1059 jaǵdaı, ósim 12 ese, syrqattanǵandardyń ishinen qyzylshaǵa qarsy 1069 adam egilmegen», - dedi Sarhat Beısenova.

«Osyǵan baılanysty, Departament áleýmettik jelilerde vaksınasıa týraly kórineý jalǵan aqparattyń taralýyna monıtorıń júrgizedi jáne medısınalyq uıymdarmen birlesip mundaı málimdemelerge jedel den qoıady. Sondyqtan túsindirý jumystarynyń nátıjesinde 2472 ata-ana vaksınasıanyń mańyzdylyǵyn túsinip, balalaryn ektirdi, onyń ishinde bıyl 623-i buryn vaksınasıadan bas tartqan bolatyn. Bul 2022 jylmen salystyrǵanda 7 ese joǵary, túsindirý jumystarynan keıin tek 80 bala egildi», - dep qosty spıker.