اتا-انالاردىڭ ءوز بالالارىن ەگۋدەن باس تارتۋى استانالىقتار اراسىندا ۆاكسينامەن باسقارىلاتىن ينفەكسيالارمەن سىرقاتتانۋشىلىقتىڭ وسۋىنە الىپ كەلەدى. بۇل تۋرالى كوممۋنيكاسيالار قىزمەتىندە وتكەن بريفينگتە استانانىڭ باس مەملەكەتتىك سانيتارلىق دارىگەرى سارحات بەيسەنوۆا ايتتى، دەپ حابارلايدى ەلوردا اكىمدىگىنىڭ رەسمي سايتى.

بيىلعى 6 ايدىڭ قورىتىندىسى بويىنشا استانا قالاسىنىڭ تۇرعىندارىن يممۋنداۋمەن قامتۋ مونيتورينگىنىڭ دەرەكتەرى بويىنشا 1 جاسقا دەيىنگى بالالاردى ديفتەرياعا، سىرەسپەگە، كوكجوتەلگە، گەموفيلدى ينفەكسياعا، پوليوميەليتكە، پنيەۆموكوككتى ينفەكسياعا، 16-17 جاس ارالىعىنداعى جاسوسپىرىمدەردىڭ ديفتەرياسىنا جانە سىرەسپەگە قارسى ەكپەلەرمەن جوسپارلى قامتۋعا قول جەتكىزىلدى.

«ناتيجەسىندە بيىلعى 6 ايدا كوكجوتەلدىڭ 435 راستالعان جاعدايى تىركەلدى، 14 جاسقا دەيىنگى بالالار اراسىندا – 417 (كورسەتكىش – 100 مىڭ تۇرعىنعا شاققاندا 30،5)، 2023 جىلى كوكجوتەلدىڭ 5 جاعدايى تىركەلدى، ءوسىم 82 ەسە. اۋرۋدىڭ نەگىزگى سەبەبى 54% نەمەسە 234 جاعدايدا اتا-انالاردىڭ كوكجوتەلگە قارسى پروفيلاكتيكالىق ەگۋدەن باس تارتۋى بولىپ سانالادى»، - دەدى ەلوردانىڭ سانيتارلىق دارىگەرى.

«وتكەن جىلدىڭ ناۋرىز ايىنان باستاپ ەلوردادا قىزىلشامەن سىرقاتتانۋشىلىقتىڭ ءوسۋى بايقالدى. بيىلعى 6 ايدا قىزىلشانىڭ 1541 راستالعان جاعدايى تىركەلدى، ونىڭ ىشىندە 14 جاسقا دەيىنگى بالالار اراسىندا 1059 جاعداي، ءوسىم 12 ەسە، سىرقاتتانعانداردىڭ ىشىنەن قىزىلشاعا قارسى 1069 ادام ەگىلمەگەن»، - دەدى سارحات بەيسەنوۆا.

«وسىعان بايلانىستى، دەپارتامەنت الەۋمەتتىك جەلىلەردە ۆاكسيناسيا تۋرالى كورىنەۋ جالعان اقپاراتتىڭ تارالۋىنا مونيتورينگ جۇرگىزەدى جانە مەديسينالىق ۇيىمدارمەن بىرلەسىپ مۇنداي مالىمدەمەلەرگە جەدەل دەن قويادى. سوندىقتان ءتۇسىندىرۋ جۇمىستارىنىڭ ناتيجەسىندە 2472 اتا-انا ۆاكسيناسيانىڭ ماڭىزدىلىعىن ءتۇسىنىپ، بالالارىن ەكتىردى، ونىڭ ىشىندە بيىل 623ء-ى بۇرىن ۆاكسيناسيادان باس تارتقان بولاتىن. بۇل 2022 جىلمەن سالىستىرعاندا 7 ەسە جوعارى، ءتۇسىندىرۋ جۇمىستارىنان كەيىن تەك 80 بالا ەگىلدى»، - دەپ قوستى سپيكەر.