16 qyrkúiekte Qyzylordada «Eralash» jeke balabaqshasyna tiesili kólik jol apatyna tústi. Oqiǵa shamamen saǵat 18:08-de QBI móltek aýdanyndaǵy S.Ysqaqov pen Eset batyr kósheleriniń qiylysynda bolǵan, dep habarlaidy Dalanews.kz.
Politsiia departamentiniń dereginshe, apatqa eki kólik qatysqan.
«Atalǵan derek boiynsha oqiǵa orny zańǵa sáikes rásimdelip, tiisti qujattar jinaqtaldy. Oqiǵaǵa bailanysty QR ÁQBtK-niń 610-baby 2 bóligimen ákimshilik hattama rásimdeldi», - dedi Qyzylorda oblysy PD.
Balabaqsha kóliginde qansha tárbielenýshi bolǵany belgisiz.
Atalǵan jaǵdai qoǵamda úlken alańdaýshylyq týǵyzdy. Osyǵan orai búgin oblys ákimi Nurlybek Nálibaev balalardyń jol qaýipsizdigine qatysty shuǵyl jinalys ótkizdi.
Aimaq basshysy jaýapty mekemelerdiń jumysyn qatań synǵa aldy.
– Buǵan deiin jeke jáne memlekettik balabaqshalardaǵy tasymal máselesine bailanysty birneshe tapsyrma bergenmin. Degenmen, jumys áli kúnge deiin durys uiymdastyrylmady. Balalardyń qaýipsizdigi – basty nazarda bolýy tiis. Barlyq kólik quraldaryn tekserip, talapqa sai kelmeitinderin paidalanýǵa tyiym salyńdar, – dedi ol.
Jiynda politsiia departamentiniń bastyǵy Serik Ergeshov arnaiy baiandama jasady. Onyń aitýynsha, tekseris barysynda 29 zańdy tulǵaǵa qatysty ákimshilik hattama toltyrylyp, 75 kólik aiyp alańyna qoiylǵan, 58 kóliktiń memlekettik nómiri tárkilengen.
Ákim bilim, mádeniet, sport basqarmalaryna jáne aýdan ákimderine balalardyń qaýipsizdigin mektepte ǵana emes, túrli mádeni-kópshilik is-sharalarda da qatań baqylaýǵa alýdy tapsyrdy.
Eske alaiyq, Qyzylordada shilde aiynda balalardy tasymaldaityn balabaqsha kóligi apatqa ushyraǵan bolatyn. Kólikte eki qyzmetker men 4 bala boldy. Saldarynan aýyr dene jaraqatyn alǵan eki búldirshin oblystyq balalar aýrýhanasynyń jansaqtaý bólimine tústi. Sondai-aq balabaqsha tárbieshisiniń kómekshisi de aýyr hálde aýrýhanaǵa jatqyzyldy.
