16 قىركۇيەكتە قىزىلوردادا «ەرالاش» جەكە بالاباقشاسىنا تيەسىلى كولىك جول اپاتىنا ءتۇستى. وقيعا شامامەن ساعات 18:08-دە قبي مولتەك اۋدانىنداعى س.ىسقاقوۆ پەن ەسەت باتىر كوشەلەرىنىڭ قيىلىسىندا بولعان، دەپ حابارلايدى Dalanews.kz.

پوليسيا دەپارتامەنتىنىڭ دەرەگىنشە، اپاتقا ەكى كولىك قاتىسقان.

«اتالعان دەرەك بويىنشا وقيعا ورنى زاڭعا سايكەس راسىمدەلىپ، ءتيىستى قۇجاتتار جيناقتالدى. وقيعاعا بايلانىستى ق ر اقبتك-نىڭ 610-بابى 2 بولىگىمەن اكىمشىلىك حاتتاما راسىمدەلدى»، - دەدى قىزىلوردا وبلىسى پد.

بالاباقشا كولىگىندە قانشا تاربيەلەنۋشى بولعانى بەلگىسىز.

اتالعان جاعداي قوعامدا ۇلكەن الاڭداۋشىلىق تۋعىزدى. وسىعان وراي بۇگىن وبلىس اكىمى نۇرلىبەك نالىبايەۆ بالالاردىڭ جول قاۋىپسىزدىگىنە قاتىستى شۇعىل جينالىس وتكىزدى.

ايماق باسشىسى جاۋاپتى مەكەمەلەردىڭ جۇمىسىن قاتاڭ سىنعا الدى.

– بۇعان دەيىن جەكە جانە مەملەكەتتىك بالاباقشالارداعى تاسىمال ماسەلەسىنە بايلانىستى بىرنەشە تاپسىرما بەرگەنمىن. دەگەنمەن، جۇمىس ءالى كۇنگە دەيىن دۇرىس ۇيىمداستىرىلمادى. بالالاردىڭ قاۋىپسىزدىگى – باستى نازاردا بولۋى ءتيىس. بارلىق كولىك قۇرالدارىن تەكسەرىپ، تالاپقا ساي كەلمەيتىندەرىن پايدالانۋعا تىيىم سالىڭدار، – دەدى ول.

جيىندا پوليسيا دەپارتامەنتىنىڭ باستىعى سەرىك ەرگەشوۆ ارنايى بايانداما جاسادى. ونىڭ ايتۋىنشا، تەكسەرىس بارىسىندا 29 زاڭدى تۇلعاعا قاتىستى اكىمشىلىك حاتتاما تولتىرىلىپ، 75 كولىك ايىپ الاڭىنا قويىلعان، 58 كولىكتىڭ مەملەكەتتىك ءنومىرى تاركىلەنگەن.

اكىم ءبىلىم، مادەنيەت، سپورت باسقارمالارىنا جانە اۋدان اكىمدەرىنە بالالاردىڭ قاۋىپسىزدىگىن مەكتەپتە عانا ەمەس، ءتۇرلى مادەني-كوپشىلىك ءىس-شارالاردا دا قاتاڭ باقىلاۋعا الۋدى تاپسىردى.

ەسكە الايىق، قىزىلوردادا شىلدە ايىندا بالالاردى تاسىمالدايتىن بالاباقشا كولىگى اپاتقا ۇشىراعان بولاتىن. كولىكتە ەكى قىزمەتكەر مەن 4 بالا بولدى. سالدارىنان اۋىر دەنە جاراقاتىن العان ەكى ءبۇلدىرشىن وبلىستىق بالالار اۋرۋحاناسىنىڭ جانساقتاۋ بولىمىنە ءتۇستى. سونداي-اق بالاباقشا تاربيەشىسىنىڭ كومەكشىسى دە اۋىر حالدە اۋرۋحاناعا جاتقىزىلدى.