Qyzylorda qalasynda 49 jastaǵy Erjan Ázenov bir jarym jyldan beri es-tússiz kúide jatyr. Ol 2024 jyldyń jazynda aýrýhanaǵa óz betimen barǵanymen, arada kóp ótpei komaǵa túsken. Qazirgi tańda naýqastyń oianyp ketý-ketpeýin dárigerlerdiń ózi naqty aita almai otyr, dep habarlaidy Dalanews.kz Informbiýro31-ge silteme jasap.
Marqum emes, biraq ómir men ólimniń arasynda jatqan azamattyń jaǵdaiyna bailanysty meditsina qyzmetkerleriniń áreketin politsiia tekserip jatyr.
Jaqyndarynyń aitýynsha, Erjan Ázenov aýrýhanaǵa ókpesine sýyq tigen soń barǵan. Alaida alǵashqy kúnderi oǵan shuǵyl meditsinalyq kómek tolyq kórsetilmegen. Tipti densaýlyǵy nasharlap tursa da, dárigerler ony úiine jibergen. Otbasy osy sheshim aýyr saldarǵa ákeldi dep esepteidi.
Qazir naýqas kózin ashqanymen, eshqandai reaktsiia bildirmeidi. Jary kún saiyn aýrýhanaǵa kelip, joldasynyń daýsyn estip, esin jiyp keterine úmittenedi.
Marqumnyń jubaiy Qarlyǵash Saqtapbergenovanyń aitýynsha, 2024 jyly kúieýi pnevmoniia belgilerimen meditsinalyq mekemege júgingen.
Onyń sózinshe, ystyq ári aýasy tar bólmede ózin jaisyz sezingen Erjan bir kúnnen keiin dárigerden ruqsat surap, úiden em qabyldaýǵa ketedi. Alaida taksige mingen sátten keiin onyń júregi birneshe minýtqa toqtap, mi qyzmeti isten shyqqan.
Sol kúnnen beri ol komada jatyr.
"Emdelemin dep óz aiaǵymen barǵan adam osyndai jaǵdaiǵa tústi. Júregi 10–11 minýt soqpai qaldy, sonyń saldarynan miy zaqymdandy. Búgingi kúnge deiin bir jyl jeti ai ótti. Sol kúni nege durys em jasalmady? Ol adamdy aman alyp qalýǵa bolatyn edi ǵoi", - deidi Qarlyǵash Saqtapbergenova.
Al meditsinalyq mekeme ókilderi kórsetilgen kómektiń standartqa sai bolǵanyn alǵa tartady.
Qyzylorda oblystyq kópbeiindi aýrýhanasy bas dárigeriniń orynbasary Gúlsim Berjapparovanyń aitýynsha, naýqas túsken kezde tekserýden ótip, pnevmoniia diagnozy qoiylǵan.
"Naýqastyń shaǵymdary men tekserý nátijesine sáikes terapiia bólimine jatqyzylyp, pýlmonolog dáriger qarady. Barlyq em-shara qoldanystaǵy meditsinalyq standartqa sai júrgizildi. Emde aýytqý boldy degenge negiz joq. Qazir de bir jarym jyldan beri baqylaýda, biraq oń dinamika baiqalmai otyr", - dedi ol.
Aýrýhana basshylyǵy naýqasty úiine jiberýge ruqsat bergen dárigerge tártiptik jaza qoldanǵan.
Al politsiia atalǵan derek boiynsha «qyzmettik mindetin tiisinshe oryndamaý» baby aiasynda tergeý júrgizip jatyr.
Jaqyndarynyń aitýynsha, Erjan Ázenov ómir boiy sportpen ainalysqan, buryn densaýlyǵyna shaǵymdanbaǵan. Qazir onyń esin jiiýyn jary men eki qyzy kún saiyn úmitpen kútip júr.
