قىزىلوردا قالاسىندا 49 جاستاعى ەرجان ازەنوۆ ءبىر جارىم جىلدان بەرى ەس-تۇسسىز كۇيدە جاتىر. ول 2024 جىلدىڭ جازىندا اۋرۋحاناعا ءوز بەتىمەن بارعانىمەن، ارادا كوپ وتپەي كوماعا تۇسكەن. قازىرگى تاڭدا ناۋقاستىڭ ويانىپ كەتۋ-كەتپەۋىن دارىگەرلەردىڭ ءوزى ناقتى ايتا الماي وتىر، دەپ حابارلايدى Dalanews.kz ينفورمبيۋرو31-گە سىلتەمە جاساپ.
مارقۇم ەمەس، ءبىراق ءومىر مەن ءولىمنىڭ اراسىندا جاتقان ازاماتتىڭ جاعدايىنا بايلانىستى مەديسينا قىزمەتكەرلەرىنىڭ ارەكەتىن پوليسيا تەكسەرىپ جاتىر.
جاقىندارىنىڭ ايتۋىنشا، ەرجان ازەنوۆ اۋرۋحاناعا وكپەسىنە سۋىق تيگەن سوڭ بارعان. الايدا العاشقى كۇندەرى وعان شۇعىل مەديسينالىق كومەك تولىق كورسەتىلمەگەن. ءتىپتى دەنساۋلىعى ناشارلاپ تۇرسا دا، دارىگەرلەر ونى ۇيىنە جىبەرگەن. وتباسى وسى شەشىم اۋىر سالدارعا اكەلدى دەپ ەسەپتەيدى.
ءقازىر ناۋقاس كوزىن اشقانىمەن، ەشقانداي رەاكسيا بىلدىرمەيدى. جارى كۇن سايىن اۋرۋحاناعا كەلىپ، جولداسىنىڭ داۋسىن ەستىپ، ەسىن جيىپ كەتەرىنە ۇمىتتەنەدى.
مارقۇمنىڭ جۇبايى قارلىعاش ساقتاپبەرگەنوۆانىڭ ايتۋىنشا، 2024 جىلى كۇيەۋى پنيەۆمونيا بەلگىلەرىمەن مەديسينالىق مەكەمەگە جۇگىنگەن.
ونىڭ سوزىنشە، ىستىق ءارى اۋاسى تار بولمەدە ءوزىن جايسىز سەزىنگەن ەرجان ءبىر كۇننەن كەيىن دارىگەردەن رۇقسات سۇراپ، ۇيدەن ەم قابىلداۋعا كەتەدى. الايدا تاكسيگە مىنگەن ساتتەن كەيىن ونىڭ جۇرەگى بىرنەشە مينۋتقا توقتاپ، مي قىزمەتى ىستەن شىققان.
سول كۇننەن بەرى ول كومادا جاتىر.
"ەمدەلەمىن دەپ ءوز اياعىمەن بارعان ادام وسىنداي جاعدايعا ءتۇستى. جۇرەگى 10–11 مينۋت سوقپاي قالدى، سونىڭ سالدارىنان ميى زاقىمداندى. بۇگىنگى كۇنگە دەيىن ءبىر جىل جەتى اي ءوتتى. سول كۇنى نەگە دۇرىس ەم جاسالمادى؟ ول ادامدى امان الىپ قالۋعا بولاتىن ەدى عوي"، - دەيدى قارلىعاش ساقتاپبەرگەنوۆا.
ال مەديسينالىق مەكەمە وكىلدەرى كورسەتىلگەن كومەكتىڭ ستاندارتقا ساي بولعانىن العا تارتادى.
قىزىلوردا وبلىستىق كوپبەيىندى اۋرۋحاناسى باس دارىگەرىنىڭ ورىنباسارى گۇلسىم بەرجاپپاروۆانىڭ ايتۋىنشا، ناۋقاس تۇسكەن كەزدە تەكسەرۋدەن ءوتىپ، پنيەۆمونيا دياگنوزى قويىلعان.
"ناۋقاستىڭ شاعىمدارى مەن تەكسەرۋ ناتيجەسىنە سايكەس تەراپيا بولىمىنە جاتقىزىلىپ، پۋلمونولوگ دارىگەر قارادى. بارلىق ەم-شارا قولدانىستاعى مەديسينالىق ستاندارتقا ساي جۇرگىزىلدى. ەمدە اۋىتقۋ بولدى دەگەنگە نەگىز جوق. ءقازىر دە ءبىر جارىم جىلدان بەرى باقىلاۋدا، ءبىراق وڭ ديناميكا بايقالماي وتىر"، - دەدى ول.
اۋرۋحانا باسشىلىعى ناۋقاستى ۇيىنە جىبەرۋگە رۇقسات بەرگەن دارىگەرگە تارتىپتىك جازا قولدانعان.
ال پوليسيا اتالعان دەرەك بويىنشا «قىزمەتتىك مىندەتىن تيىسىنشە ورىنداماۋ» بابى اياسىندا تەرگەۋ جۇرگىزىپ جاتىر.
جاقىندارىنىڭ ايتۋىنشا، ەرجان ازەنوۆ ءومىر بويى سپورتپەن اينالىسقان، بۇرىن دەنساۋلىعىنا شاعىمدانباعان. ءقازىر ونىڭ ەسىن جيۋىن جارى مەن ەكى قىزى كۇن سايىن ۇمىتپەن كۇتىپ ءجۇر.
