Qarjy vitse-ministri Erjan Birjanov májilis kýlýarynda mobildi aýdarymdarǵa qatysty jańa talaptar qyrkúiek aiynan bastap kúshine enetinin málimdedi. Alaida bul jańashyldyq qarapaiym halyqqa emes, kóleńkeli tabys kózin jasyryp júrgenderge baǵyttalǵanyn atap ótti, dep habarlaidy Dalanews.kz.
“Eger anasy qyzyna, ne ákesi balasyna, baýyrlar arasynda aqsha jiberilse – eshqandai másele týyndamaidy. Tipti bir-eki million teńge kóleminde bolsa da suraq qoiylmaidy”, – deidi vitse-ministr.
Birjanov mobildi aýdarymdardy baqylaý úsh negizgi kriteriige negizdeletinin túsindirdi:
“Birinshi – jiberýshiler sany. Eger bir adamǵa júz túrli adamnan aqsha túsip otyrsa, bul nazarǵa alynady. Al eki-úsh, tipti on adam bir-birine aqsha jiberip otyrsa – bul kriteriige sai kelmeidi.
Ekinshi – turaqtylyq. Úsh ai boiy bir adamǵa bir top adam turaqty túrde aýdarym jasasa – bul da tekseriledi.
Úshinshi – jalpy soma. Eger aýdarymdardyń jiyntyq kólemi bir million teńgeden asyp ketse, monitoringke ilinedi”, — dedi ol.
Vitse-ministrdiń aitýynsha, buǵan deiin de mobildi aýdarymdar boiynsha belgili bir derekter jinalyp otyrǵan. Al jańa júie – aýdarym somasyna bailanysty baqylaýdy zańdy túrde bekitedi. Qazir tiisti buiryq daiyn. Búgin qabyldanǵan zań jobasynan soń ol da kúshine enip, 60 kún ishinde tolyq iske qosylady.
“Qyrkúiekte júie jumys istei bastaidy. Bul qarapaiym azamattarǵa emes, salyqtan jaltaryp, jasyrynyp jumys istep júrgen kásipkerlerge baǵyttalǵan”, – dedi Erjan Birjanov.
