قارجى ۆيسە-مينيسترى ەرجان ءبىرجانوۆ ءماجىلىس كۋلۋارىندا ءموبيلدى اۋدارىمدارعا قاتىستى جاڭا تالاپتار قىركۇيەك ايىنان باستاپ كۇشىنە ەنەتىنىن مالىمدەدى. الايدا بۇل جاڭاشىلدىق قاراپايىم حالىققا ەمەس، كولەڭكەلى تابىس كوزىن جاسىرىپ جۇرگەندەرگە باعىتتالعانىن اتاپ ءوتتى، دەپ حابارلايدى Dalanews.kz.
“ەگەر اناسى قىزىنا، نە اكەسى بالاسىنا، باۋىرلار اراسىندا اقشا جىبەرىلسە – ەشقانداي ماسەلە تۋىندامايدى. ءتىپتى بىر-ەكى ميلليون تەڭگە كولەمىندە بولسا دا سۇراق قويىلمايدى”، – دەيدى ۆيسە-مينيستر.
ءبىرجانوۆ ءموبيلدى اۋدارىمداردى باقىلاۋ ءۇش نەگىزگى كريتەرييگە نەگىزدەلەتىنىن ءتۇسىندىردى:
“ءبىرىنشى – جىبەرۋشىلەر سانى. ەگەر ءبىر ادامعا ءجۇز ءتۇرلى ادامنان اقشا ءتۇسىپ وتىرسا، بۇل نازارعا الىنادى. ال ەكى-ۇش، ءتىپتى ون ادام بىر-بىرىنە اقشا جىبەرىپ وتىرسا – بۇل كريتەرييگە ساي كەلمەيدى.
ەكىنشى – تۇراقتىلىق. ءۇش اي بويى ءبىر ادامعا ءبىر توپ ادام تۇراقتى تۇردە اۋدارىم جاساسا – بۇل دا تەكسەرىلەدى.
ءۇشىنشى – جالپى سوما. ەگەر اۋدارىمداردىڭ جيىنتىق كولەمى ءبىر ميلليون تەڭگەدەن اسىپ كەتسە، مونيتورينگكە ىلىنەدى”، — دەدى ول.
ۆيسە-مينيستردىڭ ايتۋىنشا، بۇعان دەيىن دە ءموبيلدى اۋدارىمدار بويىنشا بەلگىلى ءبىر دەرەكتەر جينالىپ وتىرعان. ال جاڭا جۇيە – اۋدارىم سوماسىنا بايلانىستى باقىلاۋدى زاڭدى تۇردە بەكىتەدى. ءقازىر ءتيىستى بۇيرىق دايىن. بۇگىن قابىلدانعان زاڭ جوباسىنان سوڭ ول دا كۇشىنە ەنىپ، 60 كۇن ىشىندە تولىق ىسكە قوسىلادى.
“قىركۇيەكتە جۇيە جۇمىس ىستەي باستايدى. بۇل قاراپايىم ازاماتتارعا ەمەس، سالىقتان جالتارىپ، جاسىرىنىپ جۇمىس ىستەپ جۇرگەن كاسىپكەرلەرگە باعىتتالعان”، – دەدى ەرجان ءبىرجانوۆ.
