Qyrǵyzstan Jogorký Keneshiniń depýtaty Aisara Abdibaeva eldiń ózin sút jáne sút ónimderimen qanshalyqty qamtamasyz etip otyrǵanyna alańdaýshylyq bildirdi. Bul másele 9 aqpanda Jogorký Keneshtiń qarjy, biýdjet, kásipkerlik jáne básekeni damytý jónindegi komitetiniń otyrysynda kóterildi, dep habarlaidy Dalanews.kz.
Sý resýrstary, aýyl sharýashylyǵy jáne óńdeý ónerkásibi ministriniń birinshi orynbasary Janybek Kerimaliev Qyrǵyzstan ózin sút ónimderimen qamtamasyz etip otyrǵanyn aityp, onyń bir bóligi Qazaqstanǵa eksporttalatynyn málimdedi.
Alaida depýtat bul jaǵdaiǵa syn kózben qarap, naqty máselege nazar aýdardy.
«Bizdiń naǵyz sútimizdi satyp alyp, keiin bizge ony pasterlengen kúide 110 somnan qaita eksporttaidy. Reseiden de solai keledi. Munymen ainalysý kerek qoi», – dedi Aisara Abdibaeva.
Óz kezeginde vitse-ministr Qazaqstannyń shikizat emes, daiyn ónimdi ǵana satyp alatynyn, al pasterleý ónimniń buzylyp ketpeýi úshin jasalatynyn túsindirdi.
Biraq depýtat bul ýájge kóńili toimai, el ishinde tutynylatyn súttiń sapasyna kúmán keltirdi.
«Al bizde sút emes, bir untaq qana. Azamattarymyz untaq sút iship otyr. Bul másele boiynsha arnaiy komissiia qurý kerek. Eger fermerler Bishkekte sút satatyn dúken ashsa, ony birden alyp keter edi. Biz, qala turǵyndary, ne iship júrgenimizdi de bilmeimiz. Al ekologiialyq taza óz sútimiz shetelge ketip jatyr», – dep narazylyq bildirdi depýtat.
