Oblys ortalyǵyna kelgennen keiin Serik Jumanǵarin "Altai" kóterme-taratý ortalyǵy jobasynyń tusaýkeserimen tanysty. "Altai" kóterme-taratý ortalyǵynyń direktory Janbolat Qazanov nysan týraly tolyq aqparat berip, jobanyń jalpy quny - 33,1 mlrd.teńge ekenin atap ótti.
– Qazir kross-dogtyń, kókónis qoimasy, qonaq úi, ashana qurylysy júrgizilýde. Sonymen qatar, munda zerthana men kedendik baqylaý ornalasady. Qurylys 2 kezeńde ótedi. 1 kezeńdi aǵymdaǵy jyldyń tamyz aiynda iske qosqymyz keledi. 2 kezeń et, balyq óndirýden, bal men sútti jetkizýden turady. Onyń iske qosylýy 2024 jyly josparlanǵan, – dep qosty ol.
Danial Ahmetov munda álemdegi eń jaqsy jabdyqtar satyp alynǵanyn jáne mańyzdy elementterdiń biri et pen súttiń óńdelýi emes, baldy óńdeý bolatynyn atap ótti.
– Sapasy ortasha álemdik standartqa sáikes keletin baldyń barlyǵy derlik eksporttalýy kerek. Keshenniń ornalasqan jeri óte yńǵaily, 5 jyl ishinde osy shaǵyn aýdanda eń kóp degende 40 myń turǵyn turady, – dedi óńir basshysy.
Ári qarai Serik Jumanǵarin "Magnum" gipermarketine bardy. Sodan keiin Glýbokoe aýdany Predgornoe aýylynyń "Altyn-Shyǵys" mai ekstraktsiia zaýytynyń jumysymen tanysty.
– Búgin biz ShQO-daǵy saparymyzdy "Altai" kóterme-taratý ortalyǵynan bastadyq, bul óte qyzyq joba. Bir kezderi kóterme-taratý ortalyǵynyń qurylysy respýblikalyq biýdjet esebinen josparlanǵan bolatyn, biraq tájiribe kórsetkendei, ony jeke qarajat esebinen de júzege asyrýǵa bolady.
Sonymen qatar, munda qaraqumyq, kúnbaǵys óńdeledi. Jaqynda biz kúnbaǵys tuqymynyń eksportyn jaýyp tastadyq jáne elde qaita óńdeý ósip jatqanyn kórip otyrmyz. Sondai-aq, búgin men "Magnum" gipermarketinde kókónisterdiń sapasyn arnaiy tekserdim. Baǵalar qolaily. Ónimniń sapasy da jaqsy, – dedi QR Premer-Ministriniń orynbasary.
Sodan keiin vitse-premer Shemonaiha aýdanynyń turǵyndarymen kezdesip baǵany turaqtandyrýdaǵy jumystar týraly aitty.
– Ótken jyly birqatar bastamalar qolǵa alyndy. Baǵanyń ósýin toqtatý úshin biz turaqtandyrý qorlarynyń jumysyn tolyǵymen qaita formattadyq. Búgingi tańda bizdiń mindetimiz – baǵanyń ósýin toqtatý. Meniń oiymsha, biz muny naýryz aiynda jasai alamyz. Alańdaýǵa negiz joq. Barlyq qajetti taýarlar boiynsha ýaqtyly sheshim qabyldaimyz, – dedi ol.
Sonymen qatar, onyń aitýynsha, biyl kókónis qoimalaryn salý boiynsha arnaiy baǵdarlama iske qosylady. Sút ónimderimen qamtamasyz etý boiynsha da aýqymdy jumystar júrgiziletin bolady.
– Bizdiń elimiz sút ónimderimen tek 56%-ǵa qamtamasyz etilgen, qalǵanynyń bári importtalady. Bul turǵyda, árine, kóptegen máseleler bar, biraq biz búkil el boiynsha sút-taýarly fermalardyń qurylysyn bastaimyz. Ózin dáleldegen kásipkerlerge basa nazar aýdarylady. Sondai-aq, búgin biznesmender jumyrtqa baǵytyndaǵy qus fabrikasynyń jobasyn tanystyrdy. Osy máselelerdiń barlyǵyn keiinirek talqylaimyz, – dep tolyqtyrdy QR saýda jáne integratsiia ministri.
Kezdesý sońynda Serik Jumanǵarin qyzmetkerlermen kezdesip, "Kamyshinskoe" JShS sút-taýar fermasynyń jumysymen tanysty.
