Búgin «QazMunaıGaz» UK AQ (QMG) Basqarma tóraǵasy Maǵzum Myrzaǵalıev Baký qalasyna sapary barysynda Ázerbaıjan Respýblıkasynyń memlekettik munaı kompanıasynyń (SOCAR) prezıdenti Rovshan Nadjafpen kezdesti.

Taraptar Baký-Tbılısı-Djeıhan munaı qubyry arqyly tasymaldanatyn Qazaqstan munaıynyń kólemin kezeń-kezeńimen ulǵaıtýdy jáne Qazaqstan munaıyn Baký-Sýpsa qubyry arqyly tasymaldaý máselelerin talqylady.

— SOCAR kompanıasy QazMunaıGazdyń mańyzdy strategıalyq seriktesi. Qazaqstan munaıy tranzıtiniń kólemin kezeń-kezeńimen ulǵaıtý arqyly ózara tıimdi yntymaqtastyqtyń damýyna jańa serpin beriletinine senimdimin, — dedi M.Myrzaǵalıev.

Aıta ketsek, «QazMunaıGaz» jáne SOCAR arasynda 1,5 mln tonna Qazaqstan munaıyn Ázerbaıjan aýmaǵy arqyly tasymaldaýǵa qatysty qol qoıylǵan kelisim aıasynda Qazaqstan munaıy byltyrdan beri Aqtaý – Baký – Djeıhan baǵyty boıynsha turaqty tasymaldanyp keledi.

Aqtaý portynan 2023 jyldyń qorytyndysy boıynsha 1 057 myń tonna, al 2024 jyldyń qańtar-aqpan aılarynda 232 myń tonna munaı jóneltildi.